అంథాలజీ సిరీస్ పిట్టకథలులలో నటుల నటన అద్భుతమని కొనియాడారు హీరోయిన్స్ సమంత..రకుల్ ప్రీత్ సింగ్. ఓటీటీ దిగ్గజం నెట్ ఫ్లిక్స్ రూపొందించిన అంథాలజీ సిరీస్ పిట్ట కథలు. ఈ సిరీస్‌లోని నాలుగు కథలను నలుగురు ప్రముఖ దర్శకులు తెరకెక్కించారు. నాగ్ అశ్విన్, నందిని రెడ్డి, తరుణ్ భాస్కర్, సంకల్ప్ రెడ్డి ఈ సిరీస్‌లోని నాలుగు భాగాలను రూపొందించారు. దీనిలో శ్రుతీ హాసన్, అమలాపాల్, ఈషా రెబ్బ, మంచు లక్ష్మి, సాన్వే మేఘన, జగపతి బాబు, సత్యదేవ్ తదితరులు ప్రధాన పాత్రల్లో నటించారు. శుక్రవారం నుంచి ఈ సిరీస్ నెట్‌ఫ్లిక్స్ ద్వారా స్ట్రీమింగ్‌కు వచ్చింది. ఈ సిరీస్‌పై ప్రముఖ కథానాయికలు సమంత, రకుల్ ప్రీత్ సింగ్ ప్రశంసలు కురిపించారు. పిట్ట కథలు అందరూ చూడాల్సిన సిరీస్ అని పేర్కొన్నారు. ఈ సిరీస్‌లో మీరా అనే భాగాన్ని డైరెక్ట్ చేసిన నందినీ రెడ్డిపై సమంత ప్రశంసలు కురిపించింది. అలాగే అందులో నటించిన అమలాపాల్, జగపతి బాబును కూడా అభినందించింది. అలాగే ఈ సిరీస్‌లో రాముల భాగంలో నటించిన మంచు లక్ష్మిని కూడా సమంత ప్రశంసించింది. హీరోయిన్ రకుల్ ప్రీత్ సింగ్ కూడా మంచు లక్ష్మి నటనకు ఫిదా అయింది. మంచు లక్ష్మికి సంబంధించిన వీడియోను ఇన్‌స్టాగ్రామ్ స్టోరీస్‌లో పోస్ట్ చేసింది.
