కేరళ మంత్రిగా సీపీఐ(ఎం) నేత సాజి చెరియన్ రేపు ప్ర‌మాణ స్వీకారం చేయ‌నున్నారు. చెరియన్ ని తిరిగి క్యాబినెట్‌లోకి తీసుకునేందుకు అనుమతించాలంటూ కేరళ సీఎం పినరయి విజయన్‌ చేసిన ప్రతిపాదనకు ఆ రాష్ట్ర గవర్నర్‌ ఆరిఫ్‌ మహ్మద్‌ ఖాన్‌ ఆమోదముద్ర వేశారు. దాంతో చెరియన్ రేపు సాయంత్రం 4 గంటలకు కేరళ మంత్రిగా ప్రమాణస్వీకారం చేయబోతున్నారు. సాజి చెరియన్ గత ఏడాది జూలైలో పథనంథిట్ట జిల్లాలో రాజ్యాంగానికి వ్యతిరేకంగా వివాదాస్పద వ్యాఖ్యలు చేశారు.
దాంతో అతనిపై క్రిమినల్‌ కేసు నమోదైంది. ఆ కారణంగా ఆయన మంత్రి పదవికి రాజీనామా చేయాల్సి వచ్చింది. అయితే ఇప్పుడు ఆయనను తిరిగి క్యాబినెట్ లోకి తీసుకోవాలని సీఎం పినరయి భావించారు. ఆ మేరకు గత నెల 30న గవర్నర్‌కు అభ్యర్థన పంపారు. సీఎం ప్రతిపాదనపై గవర్నర్‌ సోమవారం అభ్యంతరం వ్యక్తంచేశారు. అయినా సీఎం మళ్లీ అదే ప్రతిపాదన చేయడంతో మంగ‌ళ‌వారం గవర్నర్‌ ఆరిఫ్‌ మహ్మద్‌ ఆమోదం తెలిపారు.