జోగులాంబ గద్వాల, (ప్రభ న్యూస్) : ఎస్సై, కానిస్టేబుల్ స్థాయి అభ్యర్థుల ఎంపిక ప్రక్రియ వేగవంతం కాబోతోంది. ఇందులో భాగంగా తుది రాత పరీక్షలో అర్హత సాధించిన జోగుళాంబ గద్వాల్, వనపర్తి జిల్లాలకు చెందిన వారి ధ్రువపత్రాలను వెరిఫై చేయనున్నారు. రేపటి (బుధవారం) నుండి ఈ నెల 24వ తేదీ వరకు 4,967 మంది అభ్యర్థుల వెరిఫికేషన్ జిల్లా పోలీస్ కార్యాలయంలో ఏఓ సతీష్ ఆధ్వర్యంలో ప్రత్యేక బృందం పరిశీలించనుందని ఎస్పీ కె సృజన తెలిపారు.
ఈ సందర్భంగా వెరిఫికేషన్ కు వచ్చే అభ్యర్థులకు పలు సూచనలు చేశారు. అభ్యర్థులకు కేటాయించిన తేదిన ఉదయం 9 గంటలకు జిల్లా పోలీస్ కార్యాలయంలో రిపోర్ట్ చేయాలన్నారు. మహిళా అభ్యర్థులు ఉదయం 8 గంటలకే జిల్లా పోలీస్ ఆఫీసులో రిపోర్ట్ చేయాలన్నారు. వెబ్సైట్ నుండి డౌన్లోడ్ చేసుకున్న ఇంటిమేషన్ లెటర్ ను తప్పనిసరిగా చూపించాల్సి ఉంటుందన్నారు. దరఖాస్తు వివరాల్లో సవరణలు అవసరం లేని అభ్యర్థులు నేరుగా పత్రాల పరిశీలన చేసుకోవచ్చని ఎస్పీ తెలిపారు.
ఒకవేళ సవరణ కోసం ఇప్పటికే ఆన్లైన్ లో అర్జీ పెట్టుకొని ఉంటే ఆ కాపీనీ తప్పనిసరిగా వెంట తెచ్చుకోవాలన్నారు. అభ్యర్థి సమక్షంలోనే ఆ సవరణలను అధికారులు ఆమోదిస్తారని, అభ్యర్థులు డ్రైవింగ్ కు సంబందించిన ధ్రువీకరణ పత్రాలు వెంట తెచ్చుకోవాలని చెప్పారు. అభ్యర్థులు ఒరిజనల్ ధ్రువీకరణ పత్రాలతో పాటు జిరాక్స్ కాపీలను కూడా తీసుకురావాలని వాటిని పరిశీలించిన అనంతరం వచ్చే అర్హత పత్రంలో సంతకం చేయడంతో ప్రక్రియ పూర్తి అవుతుందన్నారు.
