ఆంధ్రప్రదేశ్ రాష్ట్రంలోని తిరుపతి నుంచి సికింద్రాబాద్‌ వెళ్తున్న కృష్ణా ఎక్స్‌ప్రెస్‌ రైలులో ఇవాళ ఉదయం పొగలు వచ్చాయి. ఏసీ బోగీ చక్రాల నుంచి పొగలు రావడాన్ని గుర్తించిన ప్రయాణికులు.. తిరుపతి జిల్లా వెంకటగిరి-ఎల్లకారు మధ్య చైన్‌ లాగి రైలును నిలిపివేశారు.
రైల్వే కోపైలట్‌, సిబ్బంది ఏసీ బోగీ వద్దకు వచ్చి పరిశీలించారు. బ్రేకులు పట్టేయడంతో పొగలు వచ్చినట్లు వారు తెలిపారు. ఈ ఘటనతో దాదాపు 20 నిమిషాలపాటు రైలు నిలిచిపోయింది. అనంతరం మరమ్మతులు చేపట్టడంతో కృష్ణా ఎక్స్‌ప్రెస్‌ యథావిధిగా బయల్దేరింది. దీంతో పెను ప్ర‌మాదం త‌ప్పిన‌ట్లైంది.