అమరావతి, ఆంధ్రప్రభ: రాష్ట్రంలో పలు ప్రభుత్వ శాఖల్లోని ఇంజనీరింగ్‌ సర్వీసుల్లో అసిస్టెంట్‌ ఇంజనీర్‌ పోస్టుల భర్తీకి ఆంధ్రప్రదేశ్‌ పబ్లిక్ సర్వీస్ కమిషన్ పరీక్షలు(కంప్యూటర్‌ బేస్డ్‌ టెస్ట్‌) నిర్వహించింది. ఈ నెల 14, 15 తేదీల్లో మూడు పేపర్లకు పరీక్షలు నిర్వహించినట్లు ఏపీపీఎస్సీ కార్యదర్శి హెచ్‌. అరుణ్‌ కుమార్‌ ఆదివారం ఒక ప్రకటనలో తెలిపారు. ఏపీలోని 24 జిల్లాలతోపాటు తెలంగాణలోని రంగారెడ్డి, మేడ్చల్‌, మల్కాజ్‌గిరి జిల్లాల్లో ఈ రాత పరీక్షల కోసం 158 సెంటర్లు ఏర్పాటు చేశామన్నారు. 14 తేదీ ఉదయం జరిగిన పేపర్‌- 3 పరీక్షకు మొత్తం 15 వేల 707 మంది రిజిస్టర్‌ చేసుకోగా.. 11 వేల 991 మంది హాల్‌ టికెట్లు డౌన్‌లోడ్‌ చేసుకున్నారు.
వారిలో 6 వేల 804 మంది(56.74 శాతం) పరీక్షకు హాజరయ్యారు. 15వ తేదీ ఉదయం పేపర్‌- 1 పరీక్షకు 44 వేల 175 మంది దరఖాస్తు చేసుకోగా.. వారిలో 32 వేల 827 మంది హాల్‌ టికెట్లు డౌన్‌లోడ్‌ చేసుకున్నారు. వారిలో 22 వేల 101 మంది(67.32 శాతం) హాజరయ్యారు. మధ్యాహ్నం జరిగిన పేపర్‌- 2 పరీక్షకు 43 వేల 909 మంది రిజిస్టర్‌ చేసుకోగా.. వారిలో 32 వేల 827 మంది హాల్‌ టికెట్లు డౌన్‌లోడ్‌ చేసుకున్నారు. వారిలో 21 వేల 869 మంది(66.62 శాతం) హాజరైనట్లు ఏపీపీఎస్సీ కార్యదర్శి హెచ్‌. అరుణ్‌ కుమార్‌ వెల్లడించారు.