రాష్ట్రంలోని ప్రైవేటు వైద్య కళాశాలల్లో యంబీబీఎస్, పీజీ మెడికల్ యాజమాన్య కోటా సీట్ల భర్తీకి ఏప్రిల్ 1,2 తేదీల్లో వెబ్ కౌన్సిలింగ్ నిర్వహించనున్నట్లు కాళోజి నారాయణ రావు ఆరోగ్య విశ్వవిద్యాలయం ప్రకటించింది. ఈ మేరకు గురువారం మాప్ ఆఫ్ నోటిఫికేషన్ విడుదల చేసింది. యాజమాన్య కోటా సీట్ల భర్తీకి ఇప్పటికే రెండు విడతల కౌన్సిలింగ్ పూర్తి అయింది. ఖాళీ ఉన్న సీట్లను ఈ నోటిఫికేషన్ ద్వారా భర్తీ చేయనున్నారు. సీట్ల ఖాళీ వివరాలు వెబ్ సైట్ లో పెట్టినట్లు యూనివర్సిటీ వర్గాలు తెలిపాయి. ఎంబీబీఎస్ కు సంబంధించి ఈ రోజు(ఏప్రిల్ 1) సాయంత్రం 6 గంటల నుండి రేపు మధ్యాహ్నం 2 గంటల వరకు వెబ్ ఆప్షన్లు నమోదు చేసుకోవాలని పేర్కొంది. ఇప్పటికే యూనివర్సిటీ విడుదల చేసిన తుది మెరిట్ జాబితాలోని అర్హులైన విద్యార్థులు ఈ విడత వెబ్ కౌన్సిలింగ్ కు అర్హులుగా పేర్కొంది.
గత విడత కౌన్సెలింగ్ లో సీటుఅలాట్ అయి జాయిన్ కాకపోయిన చేరి డిస్ కంటిన్యూ చేసినా.. ఆల్ ఇండియా కోటాలో ఇప్పటికే సీటు పొందిన ఈ కౌన్సెలింగ్ కు అనర్హులని తెలిపింది. పీజీ యాజమాన్య కోటాకు సంబంధించి తుది మెరిట్ జాబితాలోని అర్హులైన విద్యార్థులు ఏప్రిల్ 1వ తేది ఉదయం 6 గంటల నుండి అదే రోజు సాయంత్రం 6 గంటల వరకు ప్రాధాన్యత క్రమంలో కళాశాలల వారిగా వెబ్ ఆప్షన్లు నమోదు చేసుకోవాలని యూనివర్సిటీ సూచించింది. పూర్తి వివరాలకు యూనివర్సిటీ వెబ్ సైట్ చూడాలని తెలిపింది.