ఎన్టీఆర్ వరుస సినిమాలతో బిజీగా ఉండనున్నాడు. ప్రస్తుతం కరోనా బారిన పడిన ఎన్టీఆర్.. కోలుకున్న అనంతరం వరుస షూటింగ్‌లలో పాల్గొననున్నాడు. ఇప్పటికే ఆర్.ఆర్.ఆర్ పోస్ట్ ప్రొడక్షన్ కార్యక్రమాలతో బిజీగా ఉన్న అతడు.. తరువాత కొరటాల శివతో ఓ సినిమా చేయబోతున్నాడు. ఇది కూడా పాన్ ఇండియా చిత్రమే కావడం విశేషం. అనంతరం ‘కేజీఎఫ్’ ఫేం ప్రశాంత్ నీల్‌తో ఎన్టీఆర్ ఓ సినిమా చేయనున్నట్లు వార్తలు వచ్చాయి. అయితే ప్రస్తుతం ప్రశాంత్ నీల్ .. ప్రభాస్ హీరోగా ‘సలార్’ చేస్తున్నాడు. పాన్ ఇండియా సినిమా కాబట్టి ఈ సినిమా షూటింగ్‌కు ప్రశాంత్ నీల్ చాలా సమయం తీసుకుంటాడు. దీంతో ఎన్టీఆర్‌తో ప్రాజెక్టు విషయంలో చాలామందికి అనుమానాలు వచ్చాయి.
కానీ తమ కాంబినేషన్‌లో సినిమా ఉందనే విషయాన్ని తాజాగా ఎన్టీఆర్ స్పష్టం చేశాడు. ప్రస్తుతం హోమ్ క్వారంటైన్‌లో ఉన్న ఎన్టీఆర్ ఓ మీడియా సంస్థతో ఫోన్‌లో మాట్లాడాడు. కెరీర్ పరంగా 30వ సినిమాను కొరటాల శివతో చేస్తున్న తాను, 31వ సినిమాను ప్రశాంత్ నీల్ తో చేయనున్నట్టు చెప్పాడు. కొరటాల సినిమా పూర్తికాగానే ఈ ప్రాజెక్టు పట్టాలెక్కుతుందన్నాడు. ప్రస్తుతం కొరటాల స్క్రిప్ట్ వర్కులో బిజీగా ఉన్నాడని చెప్పాడు. ‘ఆర్.ఆర్.ఆర్’ సినిమా షూటింగ్ 19 నెలల పాటు జరిగిందని, ఈ సినిమా కోసం తాము చాలా కష్టపడ్డామన్నాడు. ఈ సినిమాలోని యాక్షన్ సీన్స్ చాలా హెవీగా ఉంటాయని చెప్పాడు. కరోనా పరిస్థితులు నెలకొన్నా ఈ సినిమా దసరాకు వచ్చే అవకాశాలు ఉన్నాయని ఎన్టీఆర్ తెలిపాడు.