హైదరాబాద్‌, ఆంధ్రప్రభ : రాష్ట్ర రాజధాని హైదరాబాద్‌ నగరంలో రోజురోజుకూ పెరుగుతున్న జనాభాను తట్టుకునేందుకు టీఎస్‌ ఆర్టీసీ ప్రారంభించ తలపెట్టిన డబుల్‌ డెక్కర్‌ బస్సులు మరింత ఆలస్యం కానున్నాయి. నగర ప్రయాణికులు ఎప్పుడెప్పుడా అని ఎదురు చూస్తున్న ఈ బస్సులు రోడ్డెక్కడానికి మరో రెండు మూడు నెలల సమయం పట్టే అవకాశం ఉంది. ఈ బస్సులను గత ఏడాదే ప్రయోగాత్మకంగా నగరంలోని పటాన్‌చెరు-కోఠి, జీడిమెట్ల-సీబీఎస్‌, అఫ్జల్‌గంజ్‌-మెహిదీపట్నం వంటి ప్రధాన రూట్లలో నడపాలని ఆర్టీసీ ముందస్తు ప్రణాళికలు సిద్ధం చేసింది. అయితే, గతంలో 25 డబుల్‌ డెక్కర్‌ బస్సులు అందుబాటులోకి తీసుకు వచ్చేందుకు ప్రయత్నాలు చేసినప్పటికీ టెండర్ల ప్రక్రియకు ఆశించిన స్థాయిలో స్పందన రాలేదు.
దీంతో ఆ బస్సుల సంఖ్యను 10కి తగ్గించారు. ఆర్టీసీకి రోజురోజుకు గుదిబండగా తయారవుతున్న డీజిల్‌ భారం నుంచి బయటపడేందుకు 550 ఎలక్ట్ర్రిక్‌ బస్సులతో పాటు 10 డబుల్‌ డెక్కర్‌ బస్సులకు కూడా టెండర్లు ఆహ్వానించింది. ఈ టెండర్లను ముంబైకి చెందిన ఓ సంస్థ దక్కించుకుంది. టెండర్‌ నిబంధనల ప్రకారం ఈ నెలలోనే ఆ సంస్థ టీఎస్‌ ఆర్టీసీకి డబుల్‌ డెక్కర్‌ బస్సులు అప్పగించాల్సి ఉన్నప్పటికీ ఆ బస్సులు ఇంకా తయారీ దశలోనే ఉన్నట్లు సమాచారం. దీంతో టీఎస్‌ ఆర్టీసీ అధికారులు తయారీ ప్రక్రియను సాధ్యమైనంత త్వరగా పూర్తి చేసి బస్సులను అప్పగించాలని సంస్థ యాజమాన్యానికి స్పష్టం చేసినట్లు తెలిసింది.
ఇదిలా ఉండగా, హెచ్‌ఎండిఏ కూడా గత జనవరిలో కాలుష్యరహిత ఎలక్ట్రిక్‌ బస్సులను ప్రారంభించింది. ఖైరతాబాద్‌ నక్లెస్‌రోడ్‌లో ఈ రేస్‌ సందర్భంగా, మరో మూడు బస్సులను నగరంలోని పర్యాటక ప్రాంతాలకు కొద్ది రోజులు నడిపించారు. హైదరాబాద్‌ అందాలు, చారిత్రక కట్టడాలను వీక్షించేందుకు పర్యాటకులకు అవకాశం కల్పిస్తూ ప్రారంభించిన ఈ బస్సులను కొద్ది రోజులు మాత్రమే నడిపి హెచ్‌ఎండిఏ కూడా నిలిపివేసింది. అయితే, ఈ బస్సులకు సైతం ఆశించిన స్థాయిలో ప్రయాణికులు లేకపోవడంతో అవి కూడా మధ్యలోనే నిలిచిపోయాయి. దీంతో టీఎస్‌ ఆర్టీసీ ప్రారంభించ తలపెట్టిన డబుల్‌ డెక్కర్‌, హెచ్‌ఎండిఏ ఎలక్ట్రిక్‌ డబుల్‌ డెక్కర్‌ బస్సులు ప్రస్తుతానికి పూర్తిగా నిలిచిపోయాయి.