89.
నిన్నంజూడరొ మొన్న జూడరొజనుల్నిత్యంబు( జావంగ నా
పన్నుల్గన్న నిధాన మయ్యెడిధనభ్రాంతిన్విసర్జింప లే
కున్నారెన్నడు నిన్ను గందురికమర్త్యుల్గొల్వరేమోనినున్
జిన్నంబుచ్చకప్రోవకుండునెడలన్శ్రీకాళహస్తీశ్వరా!
ప్రతిపదార్థం:
శ్రీకాళహస్తీశ్వరా!, ఆపన్నుల్ – అపదలలోనున్నవారు, నిత్యంబు – ఎప్పుడు, చావగన్ – చనిపోవటానికి, నిన్నన్ – చూడరు – ఓ – నిన్న చూడ లేదా? , మొన్నన్ – చూడరు – ఓ – మొన్న చూడ లేదా?, కన్నన్ – చూచినా కాని, నిధానము – అయ్యెడి – నిధి వంటి, ధన – ధనమందలి, భ్రాంతిన్ – భ్రమని, విసర్జింపలేక – ఉన్నారు – వదిలి పెట్ట లేకుండా ఉన్నారు, మర్త్యుల్ – మరణం జీవలక్షణంగా ఉన్న మానవులు, ఇక – ఇంక, ఎన్నడు – ఎప్పుడు, నిన్నున్ – నిన్ను, కందురు – చూస్తారు?, చిన్నంబుచ్చక – చులకన చేయకుండా, మన్నించి్స క్షమించి, ప్రోవక – రక్షించకుండ, ఉండు – ఎడలన్ – ఉన్నట్లయితే, నినున్ – నిన్ను, కొల్వరు – ఏమో – సేవింపరేమో!
తాత్పర్యం:
శ్రీకాళహస్తీశ్వరా!రోగాదులతో బాధపడుతూ మానవులు మరణించటం నిన్న, మొన్న, అనునిత్యం చూడటం లేదా? అయినా మానవులు ఆశలకు నిలయమైన ధనమందలి భ్రాంతిని వదల లేకపోతున్నారు. ఇక నిన్నెప్పుడుదర్శించగలుగుతారు? (దర్శించలేరని భావం) తెలివితక్కువతనానికి వారిని చులకన చేయక మన్నించి రక్షించక పోతే, నిన్ను మఱచి , ఇంకా అధోగతి పాలై నిన్ను అసలు పూజించరేమో!
విశేషం:
మానవుల అజ్ఞానానికి జాలిపడి, వారిని దయదలచ వలసిన అవసరం ఏమి టంటే – వారిని అదేవిధంగా వదిలి వేసినట్లయితే ఇంకా అధోగతిపాలై ఇప్పుడున్న మాత్రపు సద్బుద్ధి కూడ ఉండకపోవచ్చు, నిన్ను పూర్తిగా మరచి పోవచ్చు. అప్పుడు ఈ మాత్రం దయచూపటానికి కూడా అర్హులు కాకపోవచ్చు. కనుక, వారు అధోగతిపాలు కాకుండా ఉండటానికి వారిని మన్నించి, రక్షించవలసి ఉంటుంది. ఇది సాటి మానవులపై ధూర్జటికి ఉన్న ప్రేమకి మరొక్క తార్కాణం.
డాక్టర్ అనంతలక్ష్మి