మెట్రో కోసం చ‌ర్య‌లు స్పీడ‌ప్‌
ఎంజీబీఎస్‌ నుంచి ఫలక్‌నుమా దాకా
5.5 కిలోమీటర్ల మేర విస్తరణ
సాలార్‌జంగ్‌ మ్యూజియం, చార్మినార్‌, శాలిబండ, షంషీర్‌ గంజ్‌, ఫలక్‌నుమా ప్రాంతాల్లో మెట్రోస్టేషన్లు
7న ఫలక్‌నుమాలో పనులకు సీఎం రేవంత్‌రెడ్డి శంకుస్థాపన
హైదరాబాద్‌, ఆంధ్రప్రభ బ్యూరో: పాతబస్తీకి మెట్రో సేవల విస్తరణపై తెలంగాణ ప్రభుత్వ ఆదేశాలతో మెట్రో అధికారులు కసరత్తు ప్రారంభించారు. ఎల్‌ అండ్‌ టీ, హెచ్‌ఎంఆర్‌ఎల్‌ అధికారులు ఎంజీబీఎస్‌-ఫలక్‌నుమా మధ్య మెట్రో రైలు కోసం ప్రణాళికలు సిద్ధం చేశారు. ఎంజీబీఎస్‌ నుంచి ఫలక్‌నుమా వరకు 5.5 కిలోమీటర్ల మేర పాతబస్తీ మెట్రో నిర్మాణం చేపట్టనున్నారు. ఈ మార్గంలో సాలార్‌జంగ్‌ మ్యూజియం, చార్మినార్‌, శాలిబండ, షంషీర్‌ గంజ్‌, ఫలక్‌నుమా ప్రాంతాల్లో మెట్రోస్టేషన్లు నిర్మిస్తారు. ఈ మార్గంలో 103 మతపరమైన నిర్మాణాలున్నాయని, మెట్రో విస్తరణలో భాగంగా వీటిని తొలగించాల్సి ఉంటుందని అధికారులు చెబుతున్నారు. అయితే.. ఎక్కువగా కట్టడాలను కూల్చకుండా 80 అడుగుల మేర రోడ్డు విస్తరణ చేసి ఈ మార్గంలో మెట్రో పనులు ప్రారంభించాలని ప్రణాళికలు సిద్ధంచేశారు. ఈ మేర‌కు ప్లాన్‌రెడీ అయిన‌ట్టు తెలుస్తోంది.
రేవంత్ చేతుల మీదుగా శంకుస్థాపన
హైదరాబాద్‌ పాతబస్తీ మెట్రో రైలు పనులకు రంగం సిద్ధమైంది. ఈ నెల 7వ తేదీన ఫలక్‌నుమాలో సీఎం రేవంత్ రెడ్డి శంకుస్థాపన చేయనున్నారు. ఎంజీబీఎస్‌ నుంచి ఫలక్‌నుమా వరకు మెట్రోరైలు పొడిగించేందుకు గతంలో బీఆర్ఎస్ ప్రభుత్వం నిర్ణయించింది. అయితే.. భూసేకరణలో సమస్యలు తలెత్తడంతో ఆ ప్రక్రియను అప్పట్లో తాత్కాలికంగా నిలిపివేశారు. తాజాగా.. భూసేకరణ సమస్యలు పూర్తి చేసి మెట్రో విస్తరణ పనులు మొదలు పెట్టేందుకు హైదరాబాద్‌ మెట్రో రైల్‌ లిమిటెడ్ (హెచ్‌ఎంఆర్‌ఎల్‌) సిద్ధమైంది.