కేంద్ర సాహిత్య అకాడమీ ఈనెల 11నుంచి 16 వరకు నిర్వహించే ప్రపంచంలో అతిపెద్ద సాహిత్యోత్సవం ‘ఫెస్టివల్ ఆఫ్ లెటర్స్ 2024’లో పాల్గొనేందుకు కరీంనగర్ కు చెందిన కవి అన్నవరం దేవేందర్ కు ఆహ్వానం అందింది. ఈ మేరకు సాహిత్య అకాడమీ కార్యదర్శి కే శ్రీనివాసరావు లేఖ రాస్తూ ఈ భారీ ఉత్సవంలో పాల్గొని ’21వ శతాబ్దపు భారతీయ కవిత్వం: కవి సమ్మేళనం’లో పాల్గొని కవిత చదవాల్సిందిగా కోరారు.
సాహిత్య అకాడమీ 70 సంవత్సరాలు పూర్తి చేసుకుంటున్న సందర్భంలో ఆరు రోజులుగా సాగే సాహిత్య ఉత్సవంలో 175 భాషల నుంచి జాతీయస్థాయిలో అన్ని ప్రాంతాల నుంచి రచయితలు, కవులు, పరిశోధకులు స్కాలర్లు పాల్గొంటున్నారు. ఈ కార్యక్రమంలోనే కథ కవిత్వం నాటక రంగంపై అంతర్జాతీయ స్థాయి సదస్సులు, సాహిత్య అకాడమీ పురస్కారాలు, ప్రఖ్యాత ఉర్దూ సినీ కవి గుల్జార్ వార్షిక ఉపన్యాసం ఉంటుందని ఆ ఆహ్వానంలో పేర్కొన్నారు. అన్నవరంకు ఈ అవకాశం రావడం పట్ల కరీంనగర్ సాహితీ లోకం హర్షం వ్యక్తం చేసింది.