విక్రమార్కుడు సినిమాలో లచ్చిందేవి పేరు చెప్పి హీరో రవితేజ మహిళలను మోసం చేసినట్టే.. సేమ్ టూ సేమ్ ఇక్కడ కూడా జరిగింది. అక్కడ హీరో అరగుండు కొట్టి వెళ్లిపోతే.. ఇక్కడ మాత్రం మోసగాళ్లు మరో విధంగా మహిళను బోల్తా కొట్టించారు. ఈ ఘటన హర్యానాలోని పానిపట్‌లో జరిగింది.
పానిపట్‌కు చెందిన ముక్తా అనే మహిళ.. సోమవారం రాత్రి ఆస్పత్రికి వెళ్లింది. అక్కడ డాక్టర్‌కు చూపించుకుని మందులు కొనేందుకు మరో ఏరియాకు వెళ్తుంటే.. చీకట్లో ఓ ఇద్దరు ఆమెకు కనిపించారు. అందులో ఒకడు తనను తాను పండితుడిగా ప‌రిచ‌యం చేసుకున్నాడు. ఆమె న‌మ్మేలా మాయమాటలు చెప్పాడు. తన మాటలు నమ్ముతోందని గ్రహించాడు.
లక్ష్మీదేవి నీపై కోపంగా ఉందే త‌ల్లి.. అని ఆమెకు చెప్పాడు. దీంతో ఆ మహిళ టెన్షన్ పడిపోయింది. కోపం పోవాలంటే ఏం చేయాలని వారిని అడిగింది. త‌ను పూర్తిగా తమ మాటలను నమ్మినట్టు గుర్తించిన ఆ ఇద్దరు ముందుగా ఆమె దగ్గరన్న బంగారు నగలు, డబ్బు తమకు ఇవ్వాలని కోరారు. ఆ త‌ర్వాత 81 అడుగులు ముందుకు వెళ్లాలని, మళ్లీ వెనక్కి రావాలని కోరారు. ఇలా చేయడం వల్ల లక్ష్మీదేవి కోపం తగ్గుతుందని నమ్మించారు.
ఇందుకు సంబంధించి ఆమెకు కొన్ని మాయమాటలు చెప్పారు. వారి మాటలు విన్న ఆ మహిళ.. తన దగ్గరున్న నగలు, పర్సు వారికి ఇచ్చి 81 అడుగులు ముందుకు వెళ్లింది. ఆ త‌ర్వాత మళ్లీ వెనక్కి తిరిగొచ్చింది. అయితే ఆమె తిరిగొచ్చేసరికి అక్కడ ఆ ఇద్దరు కనిపించలేదు. వారి కోసం చుట్టుపక్కల వెతికింది.
కొద్దిసేపటి తరువాత గానీ తాను మోసపోయాననే విషయం ఆమెకు అర్థంకాలేదు. వెంటనే పోలీస్ స్టేషన్‌కు వెళ్లి ఆ ఇద్దరు మోస‌గాళ్ల‌పై కంప్లేంట్‌ చేసింది. ఫిర్యాదును తీసుకున్న పోలీసులు ఇదంతా ఆమె గురించి తెలిసినవాళ్లు చేసిన పనే అయి ఉంటుంద‌ని అనుమానం వ్యక్తం చేశారు. సమీపంలోని సీసీటీవీ కెమెరాలను పరిశీలించి.. నిందితులను పట్టుకోవడంపై దృష్టిపెట్టారు.