లక్నో సూపర్ జెయింట్స్తో జరిగిన మ్యాచ్లో చెన్నై సూపర్ కింగ్స్ అద్భుతమైన ఆటతీరు కనబరిచింది. అటు బ్యాటింగ్, ఇటు బౌలింగ్ విభాగంలో మెరుగైన ప్రదర్శన చూపింది. దీంతో సొంత మైదానంలో అభిమానుల సందడి మధ్య విజయపతాక ఎగరేసింది. తొలుత టాస్ గెలిచిన లక్నో బౌలింగ్ ఎంచుకుని చెన్నైని బ్యాటింగ్కు ఆహ్వానించింది. దీంతో చెన్నై ఓపెనర్లు రుతురాజ్ గైక్వాడ్ (57), డేవాన్ కాన్వే (47) మంచి ఆరంభాన్ని ఇచ్చారు. ఆ తర్వాత వచ్చిన ప్లేయర్లు కూడా తమదైన శైలిలో దూకుడుగా ఆడి స్కోరు బోర్డుని పరుగులు పెట్టించారు. ఏడు వికెట్ల నష్టానికి చెన్నై జట్టు 217 పరుగులు చేసింది. ఈ క్రమంలో ధోనీ ఆడిన మూడు బంతుల్లో రెండింటిని సిక్స్లుగా కొట్టడంతో అభిమానుల ఆనందానికి అంతులేకుండా పోయింది. కాగా, ధోనీ కొట్టిన సిక్స్ ఈ సీజన్లో 100వ సిక్స్ కావడం కూడా ఇక్కడ మరో హైలైట్గా నిలిచింది.
కాగా, సెకండ్ బ్యాటింగ్కు దిగిన లక్నో జట్టు తామేమీ తక్కువ కాదన్నట్టు దూకుడుగా ఆడింది. 5 ఓవర్లలోనే 100 పరుగులు చేసి చెన్నైని ఒక దశలో బెంబేలెత్తించింది. అయితే ఆ తర్వాత మిస్టర్ కూల్ కెప్టెన్ ధోనీ స్పిన్నర్లను రంగంలోకి దించడంతో లక్నో ఆటలు సాగలేదు. దీంతో వరుసగా వికెట్లు టపటపా పడేసుకుని చిక్కుల్లో పడిపోయింది. తర్వాత కూడా ఆ జట్టులోని స్టోయినీస్ (21), నికోలస్ పూరన్ (32), ఆయుష్ బదానీ (23), గౌతమ్ 17 మంచి ఆటతీరు కనబరిచారు. 205పరుగులు చేసినా టార్గెట్ పెద్దది కావడం, సరిపోను బాల్స్ లేకపోవడంతో లక్నో ఓటమి తప్పలేదు. ఈ క్రమంలో చెన్నై 12 పరుగుల తేడాతో విజయం సొంతం చేసుకుంది.
