వేసవి ముగింపు… ఆవకాయతో పసందు.! ఇంటిలోనే ఎన్ని రకాల ఆవకాయ పచ్చళ్లు తయారు చేసుకోవచ్చో సూచించిన అమ్మమ్మలు… ఒకవేళ మీరు ఇంకా పచ్చళ్లు పెట్టుకోక పోతే ఇదే తగిన సమయం..! ఈ సీజన్లో తయారు చేసుకున్న పచ్చళ్లను వర్షాకాలంలో ఆరగారగా తింటూంటే పొందే ఆనందం వర్ణనాతీతం..
హైదరాబాద్‌, (ప్రభ న్యూస్‌) : దేశవ్యాప్తంగా విభిన్న రకాల పచ్చళ్లు ఉంటుంటాయి. కానీ దక్షిణ భారతదేశం అందునా తెలుగు రాష్ట్రాల్లో పచ్చళ్ల పరంగా చూస్తే నోరూరించే వాటి జాబితా పెద్దగానే ఉంటుంది. అమ్మమ్మల సీక్రెట్‌ పచ్చళ్లతో సహా ఈ సీజన్లో ప్రయత్నించే కొన్ని పచ్చళ్ల జాబితా ఇదిగో.. వేసవిలో పచ్చడి అనగానే జాబితాలో ముందుగా వచ్చేది మామిడి ఆవకాయ. దీనిని ఎక్కువకాలం నిల్వ ఉంచుకోవడానికి వీలుండటం(అనుకుంటాం కానీ సగం రోజుల్లోనే ఖాళీ చేసేస్తాం!). కనీస పదార్థాలతోనే చేసుకునే తీరు, కొన్నిసార్లు శెనగపప్పు లాంటి సీక్రెట్‌ ఇంగ్రీడియెంట్‌తో కూడా ఆవకాయకు కొత్త రుచులను జోడిస్తుంది. బెల్లం ఆవకాయ ఈ సీజన్లో మరో వైవిధ్యమైన పచ్చడి. బెల్లంవల్ల తియ్యదనం, మామిడిలోని పుల్లదనం… ఖచ్చితంగా అందరికీ నచ్చుతుంది. కాకపోతే బెల్లం నాణ్యత బాగుండాలని ఈ తరహా పచ్చడి పెట్టే తయారమ్మ అన్నారు. నువ్వులతో మామిడి పచ్చడి.. దీనినే నువ్వు ఆవకాయ అని కూడా అంటారు.
కాకపోతే ఈ నువ్వులను పొడి రూపంలో వాడతారు. దీని రుచి మాత్రం అమోఘం అని అనకుండా ఎవరూ ఉండరు. అల్లం ఆవకాయ వెల్లుల్లి పేస్ట్‌తో తయారమ్మ చెప్పేదాని ప్రకారం ఈ అల్లం తాజాగా ఉండాలి. పెరుగన్నంతో ఈ పచ్చడి అత్యుత్తమ కాంబినేషన్‌. పల్లీ ఆవకాయ. ఇది నిల్వ పచ్చడి కాదు కానీ ఫ్రిజ్‌లో ఉంచితే ఓ వారం బాగానే ఉంటుంది. పల్లీలు అత్యుత్తమనాణ్యతతో ఉంటే పచ్చడి కూడా ఎక్కువ కాలం నిల్వ ఉంటుంది. ఎక్కువ కాలం పచ్చడి నిల్వ ఉండాలనుకుంటే ఎండు మామిడి పచ్చడి. మాకు తెలిసి మీరిప్పటికే కొన్ని మామిడికాయలు ఆరబెట్టి ఉంటారు. ఇవి గాక పెసర ఆవకాయ, మామిడి అల్లం ఊరగాయ, పండు మిరపకాయ నిల్వ పచ్చడి వంటివి కూడా ఈ సీజన్లో ట్రై చేయొచ్చు.
లోక‌ల్ టు గ్లోబ‌ల్.. ప్రభన్యూస్ కోసం ఫేస్‌బుక్‌, ట్విట‌ర్, టెలిగ్రామ్ పేజీల‌ను ఫాలో అవ్వండి.