ప్రముఖ అండ్రాయిడ్ మొబైల్ తయారీ కంపెనీ వన్ప్లస్ నుంచి ఇండియ‌న్ మార్కెట్‌లోకి మరో స్మార్ట్‌ఫోన్‌ రానుంది. గ్లోబల్‌గా గతనెలలో లాంచ్ అయిన ప్రీమియమ్ 5జీ మిడ్‌రేంజ్ స్మార్ట్‌ఫోన్‌ ఈ నెలాఖరులో ఇండియాలో అడుగుపెట్టనుంది. వన్ప్లస్ నార్డ్ 2టీ మొబైల్ లాంచ్ కావడం దాదాపు ఖాయమైంది. వన్ప్లస్ నార్డ్ 2కు అప్‌గ్రేడ్‌గా అదే రేంజ్‌లో ఈ నార్డ్ 2టీ రానుంది. మీడియాటెక్ డైమన్సిటీ 1300 ప్రాసెసర్, ఫ్లుయిడ్ అమోలెడ్ డిస్‌ప్లే, 80వాట్ల ఫాస్ట్ చార్జింగ్‌తో పాటు మంచి స్పెసిఫికేషన్లను ఈ మొబైల్‌లో ఉండ‌నున్నాయి. కాగా, వన్ప్లస్ నార్డ్ 2టీ 5జీ జూన్‌లోనే లాంచ్ అవుతుందని టిప్‌స్టర్ పరాస్ గుగ్లానీ లీక్ చేశారు. ధర కూడా వన్ప్లస్ నార్డ్ 2 రేంజ్‌లోనే ఉంటుందని వెల్లడించారు. నార్డ్ టీ2 ప్రారంభ ధర రూ.30వేల దరిదాపుల్లోనే ఉంటుందని పేర్కొన్నారు.
వన్ప్లస్ నార్డ్ 2టీ స్పెసిఫికేషన్స్..
వన్ప్లస్ నార్డ్ 2తో పోలిస్తే కొన్ని అప్‌గ్రేడ్లతో రానుంది ఈ వెర్ష‌న్. 6.43 ఇంచుల ఫుల్ హెచ్‌డీ+ ఫ్లూయిడ్ అమోలెడ్ డిస్‌ప్లే ఉండ‌నుంది. 90Hz స్క్రీన్ రిఫ్రెష్ రేట్, కార్నింగ్ గొరిల్లా గ్లాస్ 5 డిస్‌ప్లే ప్రొటెక్షన్ ఉంటుంది. మీడియాటెక్ డైమన్సిటీ 1300 ప్రాసెసర్ ఈ మొబైల్‌లో ఉంటుంది. నార్డ్ 2లో డైమన్సిటీ 1200 ఉండగా.. ఈ విషయంలో 2టీని ప్రధాన అప్‌గ్రేడ్‌గా చెప్పవచ్చు. ఆండ్రాయిడ్‌ 12 ఆధారిత ఆక్సిజన్ ఓఎస్ 12.1పై వన్ప్లస్ నార్డ్ 2టీ రన్ అవుతుంది. మొబైల్ వెనుక మూడు కెమెరాల సెటప్ ఉంటుంది. 50 మెగాపిక్సెల్ ప్రైమరీ కెమెరా, 8 మెగాపిక్సెల్ అల్ట్రా వైడ్ యాంగిల్, 2 మెగాపిక్సెల్ మోనోక్రోమ్ సెన్సార్ ఉంటాయి. సెల్ఫీలు, వీడియో కాల్స్ కోసం 32 మెగాపిక్సెల్ ఫ్రంట్ కెమెరాతో వస్తోంది. 4500mAh బ్యాటరీ ఉంటుంది. 80వాట్ల SuperVOOC ఫాస్ట్ చార్జింగ్ టెక్నాలజీకి సపోర్ట్ చేస్తుంది.
ఫోన్ స్టోరేజ్ కెపాసిటీ, ధర ఎంతంటే..
వన్ప్లస్ నార్డ్ 2టీ రెండు వేరియంట్లలో రానుంది. 8జీబీ ర్యామ్ + 128జీబీ స్టోరేజ్, 12జీబీ ర్యామ్ + 256జీబీ స్టోరేజ్ మోడళ్లు యూరప్‌లో విడుదలయ్యాయి. అక్కడ బేస్ వేరియంట్ ధర 399 యూరోలు (రూ.32,030)గా ఉంది. అయితే భారత్‌లో వన్ప్లస్ నార్డ్ 2టీ ప్రారంభ ధర రూ.30,000గా ఉంటుందని అంచనాలు ఉన్నాయి. గ్రే షాడో, జేడ్ ఫాగ్ కలర్ ఆప్షన్‌లలో లభ్యం కావొచ్చు. ఈ-కామర్స్ సైట్ అమెజాన్‌లో ఈ ఫోన్ అందుబాటులోకి వచ్చే అవకాశాలు అధికంగా ఉన్నాయి.
లోక‌ల్ టు గ్లోబ‌ల్.. ప్రభన్యూస్ కోసం ఫేస్‌బుక్‌, ట్విట‌ర్, టెలిగ్రామ్ పేజీల‌ను ఫాలో అవ్వండి.