AP | ఓటర్ల జాబితా సవరణ ప్రక్రియను పొడిగించండి.. ఎన్నికల కమిషన్‌కు టీడీపీ వినతి

అమరావతి, ఆంధ్రప్రభ : రాష్ట్రవ్యాప్తంగా భారీ వర్షాల నేపథ్యంలో ఓటర్‌ జాబితా సవరణ ప్రక్రియను పొడిగించాలని తెలుగుదేశం పార్టీ రాష్ట్ర ఎన్నికల కమిషన్‌కు విజ్ఞప్తి చేసింది. ఈ మేరకు శుక్రవారం ఆ పార్టీ రాష్ట్ర అధ్యక్షుడు అచ్చెన్నాయుడు రాష్ట్ర ఎన్నికల ప్రధాన అధికారికి ఒక లేఖ రాశారు. భారీ వర్షాలకు అనేక ప్రాంతాల్లో కార్యకలాపాలు స్తంభించాయని పేర్కొన్నారు. ఇంకోవైపు ఎన్నికల నిర్వాహణ అనుభవం లేని సచివాలయ సిబ్బందిని ఈ ప్రక్రియలో భాగస్వాములు చేయడం సరికాదని సూచించారు. సచివాలయ సిబ్బంది స్థానంలో రెవెన్యూ, అంగన్‌వాడీ, పంచాయతీ సిబ్బంది, ఉపాధ్యాయులను బూత్‌ లెవల్‌ ఆఫీసర్లు (బీఎల్‌వో)గా నియమించి ఓటర్‌ జాబితా సవరణ ప్రక్రియను సజావుగా సాగేలా చర్యలు తీసుకోవాలని కోరారు.