‘మోసగాళ్ళ’కి పలు భాషల్లో టైటిల్స్ ..

మోసగాళ్ళు చిత్రానికి పలు  భాషల్లో టైటిల్స్ పెట్టేశారు. మంచు విష్ణు హీరోగా నటిస్తున్న లేటెస్ట్ యాక్షన్ ఎంటర్టైనర్ ఇది. ఏవీఏ ఎంటర్టైన్మెంట్ మరియు 24 ఫ్రేమ్స్ ఫ్యాక్టరీ బ్యానర్లపై మంచు విష్ణు స్వయంగా ఈ సినిమాను నిర్మించారు. హాలీవుడ్ డైరెక్టర్ జెఫ్రీ గీ చిన్ ఈ చిత్రాన్ని తెరకెక్కించారు. ఇందులో విష్ణు సోదరిగా స్టార్ హీరోయిన్ కాజల్ అగర్వాల్ నటించగా.. పవర్ ఫుల్ పోలీస్ ఆఫీసర్ గా బాలీవుడ్ నటుడు సునీల్ శెట్టి నటించారు. వాస్తవ ఘటనల ఆధారంగా ప్రపంచంలో జరిగిన అతిపెద్ద ఐటీ స్కామ్ ను ఈ చిత్రం ద్వారా వెండితెరపై ఆవిష్కరిస్తున్నారు. పాన్ ఇండియా స్థాయిలో ఈ చిత్రాన్ని తెలుగు.. తమిళం.. మలయాళం.. కన్నడ.. హిందీ భాషలలో విడుదల చేయనున్నారు. ఈ నేపథ్యంలో ఇతర భాషల్లో ‘మోసగాళ్ళు’ చిత్రానికి సంబంధించిన టైటిల్స్ ని కాజల్ అగర్వాల్ సోషల్ మీడియా వేదికగా వెల్లడించారు. తమిళ్ – కన్నడ – హిందీ భాషల్లో ”అను అండ్ అర్జున్” అనే టైటిల్ ని ఖరారు చేసారు. ఇక మలయాళంలో ”అర్జున్ అండ్ అను” అనే టైటిల్ ని పెట్టారు. కాగా ఈ చిత్రంలో రుహీ సింగ్ హీరోయిన్ గా నటించగా.. నవీన్ చంద్ర – నవదీప్ ఇతర ముఖ్య పాత్రలు పోషించారు. ఈ చిత్రానికి సామ్ సీఎస్ సంగీతం సమకూర్చగా.. షెల్డన్ చౌ సినిమాటోగ్రఫీ అందించారు. ఈ ఆక్టేన్ యాక్షన్ థ్రిల్లర్ ని భారీ బడ్జెట్ తో హై టెక్నికల్ వాల్యూస్ తో నిర్మించారు.