యాదాద్రి ఆల‌యానికి కిలో బంగారం విరాళం.. ఎవ‌రిచ్చారో తెలుసా?

Yadadri Temple: యాదాద్రి ఆల‌య విమాన గోపురానికి స్వ‌ర్ణ తాప‌డం కోసం విరాళాలు ఇవ్వాల‌ని సీఎం కేసీఆర్ ఇచ్చిన పిలుపున‌కు విశేష స్పంద‌న ల‌భిస్తోంది. తెలంగాణ నుంచే కాకుండా ఏపీ నుంచి కూడా విరాళాలు ఇచ్చేందుకు చాలా మంది ముందుకొస్తున్నారు. ఇందులో భాగంగా వైఎస్సార్ క‌డ‌ప జిల్లాకు చెందిన వ్యాపార‌వేత్త‌, చిన్నమండెం జెడ్పీటీసీ మోడెం జ‌య‌మ్మ‌.. కిలో బంగారం విరాళంగా ప్ర‌క‌టించారు. కేసీఆర్ పిలుపు మేర‌కు తాను, త‌మ‌ కుటుంబ స‌భ్యులంద‌రం క‌లిసి కిలో బంగారాన్ని దేవాల‌యానికి విరాళంగా ఇస్తున్న‌ట్లు చెప్పారు. దీనికి సంబంధించిన చెక్కును యాదాద్రి ల‌క్ష్మీ న‌ర‌సింహ స్వామి స‌న్నిధిలో అందిస్తామ‌న్నారు. యాదాద్రి ఆల‌య పునఃనిర్మాణానికి సంబంధించిన ఈ మ‌హ‌త్త‌ర కార్య‌క్ర‌మంలో భాగ‌స్వామ్యం చేసినందుకు సీఎం కేసీఆర్‌కు కృత‌జ్ఞ‌త‌లు తెలిపారు.