మానవత్వం మంట కలిసింది. పేగు బంధం మ‌రిచి, అభంశుభం తెలియని పురిటి బిడ్డను మురుగు కాలువ పక్కన చెత్త కుప్ప వద్ద వదిలేసి వెళ్లారు. ఎపుడు, ఎందుకు, ఎవరు వదిలారో తెలియదు. చివరకు ఆ శిశువు శ‌వంగా మారాడు. ఆ నోటా, ఈ నోటా ఈ సమాచారం కాస్త పోలీసుల దాకా వెళ్లింది. వారు అక్కడకు వెళ్లి పరిశీలించారు. మృతి చెందిన శిశువును మున్సిపాలిటీ వారికి అప్పగించారు. ఈ సంఘటన చిత్తూరు జిల్లా శ్రీకాళహస్తి పట్టణంలో బుధవారం వెలుగు చూసింది.
శ్రీకాళహస్తి, ప్రభ న్యూస్ : శ్రీకాళహస్తి పురపాలక సంఘం పరిధిలోని కొండమిట్ట ప్రాంతంలో ఓ పాడు పడిన ఇంటి పక్కగా మురుగు కాలువ వెళుతోంది. కాలువ సమీపంలోనే చెత్త దిబ్బ కూడా ఉంది. ఈ దిబ్బ సమీపంలో మురుగు కాలువ పక్కనే గుర్తు తెలియని వ్యక్తులు ఓ మగ శిశువును వదలిపోయారు. ఆ శిశువు పక్కనే ఓ గోనె సంచి… తాటాకుల బుట్ట కూడా ఉంది. అక్కడ పరిస్థితిని బట్టి చూస్తే… శిశువు జన్మించిన కొద్ది సేపటికే సంచిలో ఉంచి అక్కడ పడేసినట్లు తెలుస్తోంది.
ఆ పరిసర ప్రాంతాల వారు చూసే లోపే ఆ శిశువు మృతిచెంది ఉన్నాడు. కన్నవారు చంపి అక్కడ పడేశారా? లేక చని పోయిన తరువాత అక్కడ పడేశారో తెలియడం లేదు. ఇలా ఎవరు చేశారో అంతు బట్టడం లేదు. ఈ మృత శిశువును చూసి స్థానికులు కొందరు శ్రీకాళహస్తి 1వ పట్టణ పోలీసులకు సమాచారం ఇచ్చారు. వారు వెంటనే సంఘటనా స్థలానికి వెళ్లారు. చుట్టు పక్కల విచారించారు. ఆ ప్రాంత ప్రజలు తమకు తెలియదని చెప్పడంతో మృత శిశువును దహన సంస్కారాల కోసం పురపాలక శాఖ వారికి అప్పగించారు. ఈ ఘటన ఎలా జ‌రిగింద‌న్న దానిపై పోలీసులు అరా తీస్తున్నారు. కాగా, ఇది చిత్తూరు జిల్లాలోనే హాట్ టాపిక్‌గా మారింది.
