ఏపీఎస్ఆర్టీసీ బస్సులో అక్రమంగా తరలిస్తున్న 30 కిలోల గంజాయిని సూర్యాపేట జిల్లా పోలీసులు పట్టుకున్నారు. ఉదయం 11 గంటల ప్రాంతంలో కేతేపల్లి టోల్‌గేట్ వద్ద పోలీసులు వాహనాల తనిఖీలు నిర్వహించారు. ఈ నేపథ్యంలో ఏపీలోని నర్సీపట్నం నుంచి హైదరాబాద్ వస్తున్న బస్సులో 30 కిలోల గంజాయిని వారు స్వాధీనం చేసుకున్నారు.
కాగా ఈ ఘటనకు సంబంధించి ముగ్గురు నిందితులను కూడా పోలీసులు అరెస్ట్ చేశారు. సాధారణ ప్రయాణికుల మాదిరిగా నిందితులు టిక్కెట్లు తీసుకున్నారని.. గంజాయి తరలిస్తున్నట్లు తమకు తెలియదని బస్సు డ్రైవర్, కండక్టర్ పోలీసులకు వివరణ ఇచ్చారు. అయితే ఈ గంజాయిని ఎక్కడి నుంచి తీసుకువచ్చారు.. ఎక్కడికి తరలిస్తున్నారు అన్న కోణంలో పోలీసులు దర్యాప్తు చేపట్టారు.