టాటా ట్ర‌స్ట్ చైర్మ‌న్, ప్ర‌ముఖ పారిశ్రామికవేత్త రతన్ టాటాకి అస్సాం అత్యున్న‌త పుర‌స్కారం ల‌భించింది. ఈ మేర‌కు ఆ రాష్ట్ర సీఎం హిమంత బిస్వాశ‌ర్మ స్వయంగా అస్సాం వైభవ్ అవార్డును టాటాకి అందించారు. ఆ ఫొటోలు సోష‌ల్ మీడియాలో వైర‌ల్ గా మారాయి. అసోంలో క్యాన్సర్ చికిత్సను మెరుగుపరచడంలో పారిశ్రామికవేత్త , సామాజిక కార్యకర్త రతన్ టాటా అద్భుతమైన సహకారం అందించారని ముఖ్యమంత్రి శర్మ అన్నారు. ఆయనను అస్సాం వైభవ్ అవార్డుతో సత్కరించడం సంతోష‌క‌ర‌మ‌ని తెలిపారు. ఈ అవార్డుతో రతన్ టాటా ప్రశంసా పత్రం, పతకం, రూ. 5 లక్షల నగదు అందుకున్నారు. వాస్తవానికి, 2021 సంవత్సరానికి, గత నెలలో 19 మందిని అస్సాం వైభవ్ పురస్కారంతో సత్కరిస్తున్నట్లు ప్రకటించారు. గత నెల, జనవరి 24న గౌహతిలోని శ్రీమంత శంకర్‌దేవ్ కళాక్షేత్రంలో జరిగిన కార్యక్రమంలో 18 మందికి ఈ సన్మానం అందించారు.
రతన్ టాటా వ్యక్తిగత కారణాల వల్ల గౌహతికి వెళ్లలేకపోయారు, ఈ కారణంగా ముఖ్యమంత్రి శర్మ స్వయంగా ముంబైకి చేరుకుని ఆయనకు గౌరవ పుర‌స్కారాన్ని అందించారు. అంతకుముందు, గౌహతి వెళ్లలేకపోయినందుకు టాటా ముఖ్యమంత్రి శర్మకు లేఖ రాశారు. ‘2021 సంవత్సరానికి అస్సాం వైభవ్ అవార్డును ప్రదానం చేయాలని అస్సాం ప్రభుత్వం తీసుకున్న నిర్ణయం ఆనందాన్ని క‌లిగించింద‌న్నారు. అస్సాం ప్రజల సంక్షేమం పట్ల మీ వ్యక్తిగత నిబద్ధత గురించి నాకు నమ్మకం కలిగింది. ఇది మీ నుండి ఈ గౌరవాన్ని పొందడం మరింత ప్రత్యేకంగా చేస్తుంది. గౌహతికి రాలేకపోవడానికి నా వ్యక్తిగత సమస్యను అర్థం చేసుకున్నందుకు, ఆ తరువాత ముంబైకి వచ్చి నన్ను సన్మానించడానికి మీరు సుముఖత వ్యక్తం చేసినందుకు నేను మీకు కృతజ్ఞతలు తెలియజేస్తున్నాన‌ని టాటా తెలిపారు.
లోక‌ల్ టు గ్లోబ‌ల్.. ప్రభన్యూస్ కోసం ఫేస్‌బుక్‌, ట్విట‌ర్, టెలిగ్రామ్ పేజీల‌ను ఫాలో అవ్వండి..