అమెరికాలో నాలుగు రోజుల పర్యటన కోసం ప్రధాని నరేంద్ర మోదీ బ‌య‌లుదేరి వెళ్లారు. తొలిసారి నేరుగా నిర్వహిస్తోన్న క్వాడ్ సదస్సులో ఆయన పాల్గొననున్నారు. క్వాడ్ దేశాలతో ద్వైపాక్షిక సంబంధాలపై సమావేశం కానున్నారు. ఆ తర్వాత ఐక్యరాజ్య సమితి 76 వార్షిక సదస్సులో ప్రధాని మోదీ ప్రసంగించనున్నారు. పర్యటనలో భాగంగా అమెరికా అధ్యక్షుడు జో బైడెన్తోనూ ప్రధాని భేటీ కానున్నారు. ఈ నెల 25 వరకు అమెరికాలో మోదీ పర్యటన కొనసాగనుంది.
అమెరికా పర్యటనకు ముందు ప్రధాని నరేంద్ర మోదీ కీలక ప్రకటన చేశారు. అమెరికా అధ్యక్షుడు జో బైడెన్ ఆహ్వానం మేర‌కు తాను ఆ దేశానికి వెళ్తున్న‌ట్లు తెలిపారు. ఈ పర్యటనలో భారత్- అమెరికా సమగ్ర ప్రపంచ వ్యూహాత్మక భాగస్వామ్యం గురించి అమెరికా అధ్యక్షుడు జో బైడెన్తో సమీక్షించనున్నట్లు తెలిపారు. పరస్పర ప్రయోజనం ఉన్న ప్రాంతీయ, అంతర్జాతీయ సమస్యలపై చర్చించనున్నట్లు మోదీ వెల్లడించారు.
అధ్యక్షుడు జో బైడెన్, ఆస్ట్రేలియా ప్రధాని స్కాట్ మోరిసన్, జపాన్ ప్రధాని యొషిహిదె సుగాలతో కలిసి తొలిసారి ప్రత్యక్షంగా జరగనున్న క్వాడ్ సమ్మిట్‌లో పాల్గొంటానని తెలిపారు. అలాగే ఐక్యరాజ్య సమితి సర్వ సభ్య సమావేశంలో ఉగ్రవాదంపై పోరు, వాతవారణ మార్పులు సహా పలు అంశాలపై ప్రసంగించనున్నట్లు పేర్కొన్నారు.