(ప్రభ న్యూస్ బ్యూరో ఉమ్మడి రంగారెడ్డి) : రంగారెడ్డి జిల్లాలోని శంషాబాద్ ఇంటర్నేషనల్ ఎయిర్‌పోర్ట్‌కి అవార్డుల పంట పండుతోంది. ఇప్పటికే ఎన్నో అవార్డులు సొంతం చేసుకున్న జీఎంఆర్ విమానాశ్రయం తాజాగా ల్యాండ్ స్కేప్ నిర్వహణలో రెండు ప్రతిష్టాత్మక అవార్డులు గెలుచుకుంది. ఇటీవల ముగిసిన 7వ గార్డెన్ ఫెస్టివల్- 2022లో తెలంగాణ ప్రభుత్వ ఉద్యానవన శాఖ నిర్వహించిన ల్యాండ్స్కేప్, ట్రాఫిక్ ఐలాండ్ మెయింటెనెన్స్‌లో ఎయిర్‌పోర్ట్ రెండు విభాగాల్లో మొదటి స్థానంలో నిలిచింది.
హైదరాబాద్‌లోని నాంపల్లిలోని పబ్లిక్ గార్డెన్స్‌లో ఇతర భాగస్వాములు, ప్రభుత్వ అధికారుల సమక్షంలో ఏర్పాటు చేసిన ఒక కార్యక్రమంలో విమానాశ్రయ సీనియర్ అధికారులు, తెలంగాణ వ్యవసాయ, ఉద్యానవన శాఖ మంత్రి సింగిరెడ్డి నిరంజన్ రెడ్డి నుండి ఈ అవార్డులు అందుకున్నారు.
రెండు విభాగాల్లో మొదటి బహుమతి..
- ప్రైవేట్ కంపెనీలతో నిర్వహిస్తున్న ల్యాండ్స్కేప్ గార్డెన్‌లు (90 ఎకరాలకు పైగా)
- ప్రైవేట్ కంపెనీలతో నిర్వహించే ట్రాఫిక్ ఐలాండ్స్, డివైడర్లు
కాగా, రామోజీ ఫిల్మ్ సిటీ, ప్రగతి రిసార్ట్స్, అలంకృత రిసార్ట్స్, సెలబ్రిటీ క్లబ్ వంటి అనేక ప్రముఖ సంస్థలు.. అనేక ఐటీ సంస్థలు ఈ బహుమతుల కోసం పోటీ పడ్డాయి. ప్రముఖ ఉద్యానవన నిపుణులు, ప్రభుత్వ సీనియర్ హార్టికల్చర్ అధికారుల బృందం విజేతలను నిర్ణయించింది.
హైదరాబాద్ అంతర్జాతీయ విమానాశ్రయం సహజ పర్యావరణ వ్యవస్థకు ప్రసిద్ధి చెందింది, ఇక్కడ విభిన్నమైన వృక్షజాలం ఉంది. క‌చ్చితమైన నిర్వహణతో, విమానాశ్రయంలో ఏడాది పొడవునా పచ్చని దృశ్యాలు కనిపిస్తాయి, సందర్శకులను మంత్రముగ్ధులను చేస్తాయి.
