మాహారాష్ట్ర సీఎం ఉద్ధవ్ థాకరే రాజీనామా చేస్తున్నట్టు ప్రకటించారు. ఇవ్వాల రాత్రి జరిగిన ఫేస్ బుక్ లైవ్ ద్వారా మహారాష్ట్ర ప్రజలనుద్దేశించి ప్రసంగించారు ఉద్ధవ్. బలపరీక్షకు ముందే ఉద్ధవ్ రాజీనామా చేస్తున్నట్టు తెలిపారు. రేపు జరిగే బలపరీక్షకు వెళ్లి భంగపాటుకు గురయ్యే బదులు.. దానికి ముందే హుందాగా ఆయన రాజీనామా చేసినట్టు తెలుస్తోంది. నమ్మిన వ్యక్తులే తనను మోసం చేశారని, శివసేన ఎప్పుడు, ఎవరినీ ఇబ్బంది పెట్టలేదని ఉద్ధవ్ థాకరే తెలిపారు. ఈ సందర్భంగా ఆయన ఎన్సీపీ అధినేత శరద్ పవార్కు, కాంగ్రెస్ అధినేత్రి సోనియా గాంధీకి కృతజ్ఞతలు తెలిపారు.
మహారాష్ట్ర కేబినెట్ ఇవ్వాల (బుధవారం) సాయంత్రం సీఎం ఉద్ధవ్ థాకరే ఆధ్వర్యంలో భేటీ అయ్యింది. ఈ సమావేశంలో పలు కీలక నిర్ణయాలు తీసుకుంది మంత్రి వర్గం. ఔరంగాబాద్, ఉస్మానాబాద్ పేర్లను శంభాజీనగర్, ధరాశివ్‌గా మారుస్తూ మంత్రి వర్గం ఆమోదించింది. అలాగే నవీ ముంబై విమానాశ్రయం పేరును కూడా డీబీ పాటిల్ అంతర్జాతీయ విమానాశ్రయంగా మారుస్తున్నట్టు కేబినెట్ ప్రకటించింది.. అయితే ఇవే అంశాలను మహారాష్ట్ర ప్రజలకు ఫేస్ బుక్ లైవ్ ద్వారా సీఎం ఉద్ధవ్ థాకరే చెప్పే ప్రయత్నం చేశారు. మహారాష్ట్ర సీఎంగా ఉద్ధవ్ థాకరేను తొలగించలేదని, శివసేన పార్టీ నమ్మినవారే మోసం చేశారని ఆవేదనగా చెప్పారు.