హర్యానాలోని గురుగ్రామ్‌లో ఒళ్లు గగుర్పొడిచే ఘటన శుక్రవారం చోటు చేసుకుంది. కొన్ని వేల వోల్టుల శక్తి ఉన్న పిడుగు మీదొచ్చి పడితే.. ఉన్న ప్రాణం ఉన్న చోటునే పోతుంది. ఓ నలుగురు తోటమాలులకూ ఇదే పరిస్థితి ఎదురైంది. గురుగ్రామ్ సెక్టార్ 82లోని వాటికా సిగ్నేచర్ విల్లాస్‌లో ఈ ఘటన జరిగింది.
శుక్రవారం దేశ రాజధానిలో వర్షం బీభత్సం సృష్టించింది. దీంతో వర్షం పడుతోందని భావించిన సదరు విల్లాస్‌లో పనిచేసే ఆ నలుగురు తోటమాలులు ఓ చెట్టు కిందకు వెళ్లి నిలబడ్డారు. వాళ్లు వెళ్లి అలా నిలబడ్డారో లేదో.. కాసేపటికే ఆ చెట్టుపై ఉన్నట్టుండి పిడుగు పడింది. నలుగురు వ్యక్తులు ఉన్న చోటనే కుప్పకూలిపోయారు. అదృష్టం కొద్దీ వారు బతికే ఉండడంతో మనేసర్‌లోని ఓ ప్రైవేట్ ఆస్పత్రికి తరలించారు. బాధితుల్లో ముగ్గురికి ప్రాణాపాయం తప్పగా.. ఓ వ్యక్తి పరిస్థితి మాత్రం విషమంగా ఉండటంతో ఐసీయూలో చికిత్స అందిస్తున్నారు.