వన్డే ప్రపంచకప్‌ సమస్యలు హైద‌రాబార్ క్రికెట్ అసోసియేషన్ ను వెంటాడుతూనే ఉన్నాయి. వ‌ర‌ల్డ్ క‌స్ కి సమయం సమీపిస్తున్న కొద్దీ, షెడ్యూల్‌లో మార్పులు చేయాలంటూ రాష్ట్ర క్రికెట్ సంఘాలు బీసీసీఐకి లేఖలు పంపుతూనే ఉన్నాయి. ఉప్పల్ వేదికగా జరగనున్న పాక్-శ్రీలంక మ్యాచ్ షెడ్యూల్‌ను మార్చాలని హైదరాబాద్ క్రికెట్ అసోసియేషన్ (హెచ్‌సీఏ) ఇటీవల బీసీసీఐని అభ్యర్థించింది.
ఉప్పల్ మూడు మ్యాచ్‌లకు ఆతిథ్యం..
ఈ మెగా టోర్నీలో రాజీవ్ గాంధీ అంతర్జాతీయ స్టేడియంలో మూడు మ్యాచ్‌లు జరగనున్నాయి. అక్టోబర్ 6న పాకిస్థాన్ వర్సెస్ నెదర్లాండ్స్, అక్టోబర్ 9న న్యూజిలాండ్ వర్సెస్ నెదర్లాండ్స్, అక్టోబర్ 10న పాకిస్థాన్ వర్సెస్ శ్రీలంక మధ్య మ్యాచ్ జరగనుంది.
భద్రతా సమస్యలు
ఓ వైపు తెలంగాణలో అక్టోబరులో అసెంబ్లీ ఎన్నికలు జరిగే అవకాశం ఉండగా, మరోవైపు వరుస రోజుల్లో మ్యాచ్ ల నిర్వహణపై హైదరాబాద్ పోలీసులు భద్రతపై ఆందోళన వ్యక్తం చేసినట్లు తెలుస్తోంది. ఈ రెండు మ్యాచ్‌ల మధ్య కనీసం ఒక్కరోజు గ్యాప్ ఉండేలా చూడాలని పోలీసులు భావిస్తున్నారు. ఇప్పటికే ఈ విషయాన్ని హెచ్‌సీఏ దృష్టికి తీసుకెళ్లిన వారు..అక్కడి నుంచి బీసీసీఐకి చేరినట్లు తెలుస్తోంది.
తొలి షెడ్యూల్ ప్రకారం అక్టోబర్ 12న శ్రీలంక-పాక్ మ్యాచ్ జరగాల్సి ఉండగా.. భారత్-పాక్ మ్యాచ్ అక్టోబరు 14కి రీషెడ్యూల్ కావడంతో.. లంకతో మ్యాచ్ ను అక్టోబర్ 10కి మార్చి పాక్ జట్టుకు తగిన సమయం ఇచ్చింది. అలాగే, కోల్‌కతాలో జరగాల్సిన పాకిస్థాన్-ఇంగ్లాండ్ మ్యాచ్ నవంబర్ 12న కాకుండా నవంబర్ 11న జరగనుంది. HCA విజ్ఞప్తిపై BCCI మరియు ICC ఎలా స్పందిస్తాయన్నది ఆసక్తికరంగా మారింది.