బాలీవుడ్ హీరోయిన్ పరిణితీచోప్రాతో రిలేషన్ పై ఆమ్ ఆద్మీ పార్టీకి చెందిన రాజ్యసభ సభ్యుడు రాఘవ్ చద్దాని ప్రశ్నించింది మీడియా. కాగా వీరిద్దరు డేటింగ్లో ఉన్నారని.. త్వరలో పెళ్లి కూడా చేసుకోబోతున్నారంటూ గత కొన్ని రోజులుగా తెగ ప్రచారం జరుగుతోంది. ఈ విషయమై వీరిద్దరినీ మీడియా ఎక్కడ కనిపించినా ప్రశ్నిస్తోంది. అయితే డేటింగ్, పెళ్లి విషయంపై ఇరువురూ ఇప్పటి వరకూ స్పష్టత ఇవ్వలేదు. తాజాగా రాఘవ్ చద్దాకు మరోసారి అలాంటి ప్రశ్నే ఎదురైంది. ఢిల్లీ సీఎం అరవింద్ కేజ్రీవాల్ నేతృత్వంలోని ఆమ్ ఆద్మీ పార్టీ (ఆప్)కి జాతీయ హోదా కల్పిస్తూ కేంద్ర ఎన్నికల సంఘం సోమవారం ప్రకటించిన విషయం తెలిసిందే. ఈ ప్రకటనతో ఆ పార్టీలో సంబరాలు మిన్నంటాయి.
ఈ నేపథ్యంలో ఢిల్లీలోని ఆఫీసులో పార్టీ కన్వీనర్, ఢిల్లీ ముఖ్యమంత్రి అరవింద్ కేజ్రీవాల్ ప్రసంగించారు. పార్టీ కోసం కష్టపడిన వారందరికీ ప్రత్యేకంగా ధన్యవాదాలు తెలిపారు. ఈ కార్యక్రమానికి రాఘవ్ చద్దా కూడా వచ్చారు.ఈ సందర్భంగా రాఘవ్ చద్దాను మీడియా ప్రతినిధులు రాజనీతి గురించి కాకుండా పరిణీతి గురించి ప్రశ్నించారు. దీనిపై ఎంపీ స్పందిస్తూ ‘నేను మీకు చెప్తా. ఆ అంశంపై మనం ప్రత్యేకంగా ఓ ఇంటర్వ్యూ పెట్టుకుందాం’ అంటూ నవ్వుతూ అక్కడి నుంచి వెళ్లిపోయారు. దాంతో వీరిద్దరిపై వస్తున్న రూమర్స్ నిజమే అయి ఉంటుందని లేనిపక్షంలో నవ్వుతూ ఎందుకు వెళ్లి పోతారని అనుకుంటున్నారు జనం.