భారత అంతరిక్ష సంస్థ ఇస్రో.. సూర్యుని అధ్యయనం కోసం ఆదిత్య ఎల్1 మిషన్‌ను ప్రారంభించింది. కాగా, ఈ మిషన్ త్వరలో చివరి దశకు చేరుకుంటుంది. సూర్యునిపై అధ్యయనం చేసేందుకు ప్రయోగించిన ఆదిత్య ఎల్1 మిషన్ జనవరి 6న త‌న గమ్యస్థానానికి (ఎల్-1 పాయింట్‌కు) చేరుకుంటుందని ఇస్రో చైర్మన్ సోమనాథ్ ప్రకటించారు. ఆ రోజున కచ్చితమైన వివరాలు వెల్లడిస్తామని వెల్లడించారు.
స్పేస్‌క్రాఫ్ట్ ఎల్-1 పాయింట్‌కి చేరుకోగానే ఇంజన్ మరోసారి మండుతుందని సోమనాథ్ తెలిపారు. తర్వాత, అంతరిక్ష నౌకను ఎల్-1 కేంద్రంలో స్థిరపరుస్తామని, విజయవంతంగా ఆ స్థానానికి చేరుకున్న తర్వాత అక్కడ కక్ష్యలో కొనసాగుతుందని వివరించారు. ఆదిత్య ఎల్1 ద్వారా సేకరించిన డేటా సూర్యుడిలో వచ్చే మార్పులు, మానవ జీవితంపై వాటి ప్రభావాన్ని అర్థం చేసుకునేందుకు భారత్ సహా ప్రపంచ దేశాలకు ఐదేళ్లపాటు ఉపయోగపడుతుందని సోమనాథ్ వెల్లడించారు.