హ‌నుమ‌కొండ – రాష్ట్రమంతటా పెండింగ్ ట్రాఫిక్ చాలాన్స్ స్పెషల్ డ్రైవ్ జరుగుతుంటే ఆ ట్రాఫిక్ ఎస్సై మాత్రం తన కలెక్షన్ల స్పెషల్ డ్రైవ్ చేస్తున్నాడు. డ్రైవింగ్ లైసెన్స్ లేని యువకుల నుండి లంచం తీసుకున్న ఆ ట్రాఫిక్ ఎస్సై అడ్డంగా దొరికిపోయాడు. అతను లంచం తీసుకుంటున్న వీడియో పోలీస్ కమిషనర్ దృష్టికి చేరడంతో వారి పై సస్పెన్షన్ వేటు పడింది.
ఈ సంఘటన హనుమకొండలో జరిగింది. వివ‌రాల‌లోకి వెళితే హనుమకొండలోని ములుగు రోడ్ వద్ద ట్రాఫిక్ విధులు నిర్వహిస్తున్న క్రమంలో ఆ మార్గంలో ఇద్దరు యువకులు డ్రైవింగ్ లైసెన్స్ లేకుండా బైక్ నడుపుతున్నారు. కానిస్టేబుల్ వారిని పట్టుకొని సదరు ఎస్సై వద్దకు తీసుకొచ్చాడు. వారి పై చర్య తీసుకొని బుద్ది చెప్పాల్సిన ఎస్సై లంచానికి కక్కుర్తి పడ్డాడు. వాహనదారుడి నుంచి లంచం తీసుకుంటుండగా అక్కడే బిల్డింగ్ పైన ఉన్న ఓ వ్యక్తి ఈ వ్యవహారం మొత్తం తన సెల్ ఫోన్లో షూట్ చేశాడు. లంచం తీసుకుంటున్న వీడియో సిటీ పోలీస్ కమిషనర్ దృష్టికి చేరడంతో ట్రాఫిక్ ఎస్సై డేవిడ్ను సస్పెండ్ చేస్తు వరంగల్ పోలీస్ కమిషనర్ అంబర్ కిశోర్ ఝా శ‌నివారం నాడు ఉత్తర్వులు జారీ చేశారు. ఈ లంచాల వ్యవహారంలో అతనికి సహరించిన కానిస్టేబుల్స్ పై కూడా విచారణకు ఆదేశించారు.