కుత్బుల్లాపూర్, (ప్రభ న్యూస్): హైదరాబాద్లోని కుత్బుల్లాపూర్ నియోజకవర్గం, ప్రగతి నగర్లో భూ కబ్జా దారులు రెచ్చిపోతున్నారు. చెరువు శిఖం భూమిని ఆక్రమించుకనేందుకు తప్పుడు సర్వే నెంబర్లతో మిషన్లను దింపారు. దీంతో స్థానిక ఆల్విన్ కాలనీ ఎంప్లాయిస్ అంతా కలిసి కబ్జాని అడ్డుకునేందుకు యత్నించారు. కాగా, ఇవ్వాల భూ కబ్జాని నిరసిస్తూ ఆందోళన చేపట్టి, మున్సిపల్ కమిషనర్గా వినతిపత్రం అందజేశారు. ఈ సందర్భంగా మీడియాతో అల్విన్ కాలనీ ఎంప్లాయీస్ అసోసియేషన్ అధ్యక్షుడు సుధీర్రెడ్డి మాట్లాడుతూ.. 1996లో తాము ఇక్కడ ఇండ్లు కట్టుకుని నివాసం ఉంటున్నట్టు తెలిపారు. అప్పటినుంచి ఈ ప్రదేశంలో డంపింగ్ యార్డు, శ్మశాన వాటిక ఉన్నాయి. ఈ ఏరియాలో అదొక్కటే శ్మశానవాటిక కావడం, అక్కడే తమ కుటుంబంలో చనిపోయిన వారిని దహన సంస్కారాలు చేశామని చెప్పారు.
ఇక.. డంపింగ్ యార్డులో తడి, పొడి చెత్తను వేరు చేసి వర్మి కంపోస్టు తయారు చేసి అందిస్తున్నట్ట సుధీర్రెడ్డి తెలిపారు. ఇవ్వాల సడెన్గా శంశీగూడ (కూకట్పల్లి) సర్వే నెంబర్ 57 పేరు చెప్పి.. కోర్టు జడ్జిమెంట్ అన్న తప్పుడు పత్రాలతో అనుమతులు పొందారని వారు ఆరోపించారు. ఇట్లా భూమిని కాజేసేందుకు కొంతమంది కబ్జాకు దిగారని, భయ భ్రాంతులకు గురిచేస్తూ డంపింగ్ యార్డుని పూడ్చి వేశారని, అదే విధంగా శ్మశాన వాటికను కూడా ఆక్రమించుకునేందుకు యత్నిస్తున్నారని తెలిపారు.
తెలంగాణ ప్రభుత్వంలో ఇట్లాంటి భూ కబ్జాలు జరగడం దారుణం అని, ప్రగతి నగర్ ప్రజలు భయపడుతున్నారి సుధీర్రెడ్డి ఆవేదన వ్యక్తం చేశారు. పెద్ద పెద్ద మిషన్లను పెట్టి, గూండాలను దింపి భూ కబ్జా చేస్తున్నారని, వాళ్లకు నిజంగా పట్టా ఉండి, కోర్టు ఆర్డర్ ఉంటే తమకేమీ ఇబ్బంది లేదన్నారు. కానీ, చెరువు శిఖం భూమి.. గాజులరామారం సర్వే నంబర్ 305లో.. వాటర్ బాడీ శిఖం భూమిని ఆక్రమించుకోవడానికి కబ్జాదారులు యత్నిస్తున్నారని సుధీర్రెడ్డి అన్నారు. ఈ విషయంలో ప్రభుత్వం, నిజాంపేట్ మున్సిపల్ అధికారులు చొరవ తీసుకోవాలని, ఈ భూమిని కబ్జాదారుల నుంచి కాపాడాలని కోరారు.