ఏపీలోని ప్రముఖ పుణ్యక్షేత్రం సింహాచలంపైనా కరోనా ప్రభావం పడింది. ఇక్కడి సింహాద్రి అప్పన్న కల్యాణోత్సవం ఈసారి ఏకాంతంగానే జరపాలని నిర్ణయించామని ఆలయ ట్రస్టు చైర్ పర్సన్ సంచయిత గజపతి వెల్లడించారు. భక్తుల ఆరోగ్య భద్రతను దృష్టిలో ఉంచుకుని ఈ నిర్ణయం తీసుకున్నామని పేర్కొన్నారు. రాత్రి 9 గంటల నుంచి సింహాద్రి స్వామి, ఆండాళ్ అమ్మవారి కల్యాణ మహోత్సవం ఆన్ లైన్ లో (https://youtu.be/M_gFbdLzweY) ఈ లింకు ద్వారా వీక్షించవచ్చని సంచయిత తెలిపారు.
స్వామివారి కల్యాణోత్సవాన్ని ప్రత్యక్షంగా వీక్షించాలని కోరుకున్న చాలామంది భక్తులకు ఇది నిరాశ కలిగించే పరిణామం అని ఆమె అభిప్రాయపడ్డారు. కానీ కొవిడ్ వ్యాప్తి అధికస్థాయిలో ఉండడంతో ఈ నిర్ణయం తీసుకోకతప్పలేదని తెలిపారు. ప్రజలందరూ మాస్కులు ధరిస్తూ, శానిటైజేషన్, భౌతికదూరం పాటిస్తూ కరోనా నివారణ మార్గదర్శకాలను తప్పనిసరిగా పాటించాలని, వ్యాక్సిన్ వేయించుకోవాలని పిలుపునిచ్చారు. వచ్చే ఏడాది కల్యాణోత్సవంలో భక్తులకు ప్రత్యక్షంగా పాల్గొనే అవకాశం లభిస్తుందని ఆశిద్దాం అని సంచయిత పేర్కొన్నారు.