రాగం : కళ్యాణి
ఈపెకు ఇతడు తగు ఇతనికి ఈపెతగు
చూపులకు పండుగాయ శోభనము నేడు ||ఈపెకు ఇతడు తగు||
పిలువరె పెండ్లికూతురు పెండ్లిపీట మీదికి
చెలగీ తానెదురు చూచీ దేవుడు
బలువుగా యిద్దరికి బాసికములు కట్టరే
కలిమెల్ల మెరసీ సింగారించరే ||ఈపెకు ఇతడు తగు||
ఆతల తెచ్చి పెట్టరే ఆ పెండ్లి కూతురును
ఆతడె జంట శోభన మిద్దరికిని
కాతరాన బువ్వానకు గక్కన వెట్టరె మీరు
రేతిరి నుండియు వేగించరే మీరు ||ఈపెకు ఇతడు తగు||
పానుపులు పరచరే బలునాగవల్లి నేడు
పూనితెర వేయరే పొలతులాల
ఆనుక శ్రీవేంకటేశుడలమేలు మంగయును
లోననే భూకాంతయును లోలులైరి తాము ||ఈపెకు ఇతడు తగు||