(”అన్నమాచార్య జీవిత చరిత్ర ” పీఠిక )
లాలనుచు నూచేరు లలన లిరుగడల
బాల గండవర గోపాల నిను చాల || ||లాలనుచు నూచేరు||
ఉదుటుగుబ్బల సరము లుయ్యాల లూగ
పదరి కంకణరవము బహుగతుల మ్రోగ
వొదిగి చెంపల కొప్పు లొక్కింత వీగ
ముదు చెమటల నళికములు తప్పదోగ || ||లాలనుచు నూచేరు||
సొలపు తెలకన్నుగవచూపు లిరువంక
మలయురవళులకు పలుమాఱును బెళంక
కొలది కోవిలగములు క్రోలు మదనాంక
ముల గ్రేణిసేయు రవముల వడి దలంక || ||లాలనుచు నూచేరు||
సరసపదములు జంగచాపుచే పాయ
గురులీల మీగాళ్ళ గుచ్చెళ్ళు రామ
కరమూలముల కాంతి కడుజాయ చేయ
సరస నురు కుసుమ వాసన లెదురు డాయ || ||లాలనుచు నూచేరు||
కొలది ననుమేను లతకూన లసియాడ
మెలకువతొ నొకరొకరి మెచ్చి సరిగూడ
తలలూచి చొక్కి చిత్తురుబొమ్మలాడ
అలరి యెల్లరు మోహనాకృతులు చూడ || ||లాలనుచు నూచేరు||
లలిత తాంబూల రసకలితంబు లైన
తళుకుదంతములు కెంపులగుంపులీన
మొలకవెన్నెలడాలు ముసురుకొని తోన
చెలగి సెలవుల ముద్దు చిఱునవ్వులాన || ||లాలనుచు నూచేరు||
మలయమారుత గతులు మాటికి చెలంగ
పలుకు కపురపుతామి పైపై మెలంగ
బలుగానలహరి యుంపుల రాల్గరంగ
బలసి వినువారి చెవి బడలిక దొలంగ || ||లాలనుచు నూచేరు||
లలనాజనాపాంగ లలితసుమచాప
జలజలోచనదేవ సద్గుణకలాప
తలపు లోపల మెలగు తత్వప్రదీప
భళిర గండవరేశ పరమాత్మరూప || ||లాలనుచు నూచేరు||