పారిశ్రామికవాడలో డ్రగ్స్ కలకలం
ఇంటర్పోల్ సమాచారం
రంగంలోకి దిగిన అధికారులు
పీఎస్ఎన్ మెడికేర్ పరిశ్రమలో సోదాలు
తనిఖీల్లో భారీగా పట్టుబడ్డ నిషేధిత డ్రగ్స్
9 కోట్ల విలువచేసే మెఫీడ్రిన్ స్వాధీనం
ప‌దేండ్లుగా సాగుతున్న వ్యాపారం
సిగ‌రెట్ల‌లో పెట్టి అమ్ముతున్న‌ట్టు గుర్తింపు
పటాన్చెరు (ప్రభ న్యూస్) : హైదరాబాద్ - సంగారెడ్డి ప‌రిధిలోని బొల్లారం పారిశ్రామిక వాడలో డ్రగ్స్ కలకలం చెల‌రేగింది. పారిశ్రామిక వాడ‌లోని ఓ పరిశ్రమలో శుక్రవారం ఇంటర్పోల్ స‌మాచారంతో అధికారులు దాడులు చేప‌ట్టారు. బొల్లారం పారిశ్రామికవాడలోని పీఎస్ఎన్ మెడికేర్ ప్రైవేట్ లిమిటెడ్ పరిశ్రమలో డ్రగ్ కంట్రోల్ అధికారులు సోదాలు నిర్వహించారు. ఈ సోదాల్లో దాదాపు 9 కోట్ల రూపాయల విలువచేసే 90 కిలోల మేపిడ్రీన్ డ్రగ్‌ని అధికారులు స్వాధీనం చేసుకున్నారు. అధికారుల ప‌రిశీల‌న‌లో పది సంవత్సరాల నుంచి డ్రగ్ తయారు చేసి విదేశాలకు తరలిస్తున్నట్లుగా తేలింది. ఈ వ్యవహారానికి సూత్రధారి అయిన కస్తూరి రెడ్డి నల్లపొడి అనే వ్యక్తిని డ్రగ్ కంట్రోల్ అధికారులు అరెస్టు చేశారు. సిగరెట్ ప్యాకెట్లలో ఈ డ్రగ్‌ను పెట్టి విదేశాలకు తరలిస్తున్నట్లు గుర్తించారు. దీనిలో కొంతవరకు హైదరాబాద్ నగరంలో కూడా సప్ల‌య్‌ చేసినట్లు డ్రగ్ కంట్రోల్ అధికారులు అనుమానం వ్యక్తం చేస్తున్నారు.
