బెంగాల్, అసోంలో.. రెండో విడత పోలింగ్ ప్రారంభమైంది. ఓటు వేసేందుకు ఇప్పటికే పలు కేంద్రాల్లో ప్రజలు బారులు తీరారు. ఉదయం 7 గంటలకు మొదలైన పోలింగ్.. సాయంత్రం 6 గంటల వరకు సాగనుంది. కొవిడ్ నిబంధనలు- పటిష్ఠ భద్రతా ఏర్పాట్ల మధ్య రెండో దశ పోలింగ్ సాగనుంది. ఇందుకోసం అధికారులు ముమ్మర ఏర్పాట్లు చేశారు.
బెంగాల్ లోని నందిగ్రామ్ నియోజకవర్గంలో పోలింగ్ కేంద్రంలో అధికారులు.. ఏర్పాట్లను ముమ్మరం చేశారు. బెంగాల్, అసోంలోని పోలింగ్ కేంద్రాల్లో ప్రజలు ఇప్పటికే ఓటు హక్కును వినియోగించుకునేందుకు ఎదురుచూస్తున్నారు. అసోంలో 39, బెంగాల్ లో 30 అసెంబ్లీ స్థానాలకు ఉదయం 7 గంటల నుంచి ఓటర్లు తమ ఓటు హక్కును వినియోగించుకుంటున్నారు. పోలింగ్ సాయంత్రం 6 గంటల వరకు కొనసాగనుంది.
అసోంలో మొత్తం 126 నియోజకవర్గాలు ఉండగా మూడు విడతల్లో ఎన్నికలు జరగనున్నాయి. 47 స్థానాలకు గత నెల 27న తొలివిడత ఓటింగ్ జరిగింది. బెంగాల్ లో లో 8 విడతల సుదీర్ఘ ఎన్నికల ప్రక్రియలో భాగంగా తొలి దశలో 30 స్థానాల్లో పోలింగ్ గత నెల 27న జరగింది. తాజాగా జరగనున్న పోలింగ్లో అందరి దృష్టి నందిగ్రామ్ నియోజకవర్గంపైనే ఉంది. సీఎం మమతా బెనర్జీ- బిజెపి నేత సువేందు అధికారి ఈ నియోజకవర్గం నుంచి బరిలో దిగడం ఇందుకు కారణం.
నందిగ్రామ్వాసులు తమ ఓటు హక్కును వినియోగించుకునేందుకు పోలింగ్ కేంద్రాలకు తరలివెళుతున్నారు. పోలింగ్ మొదలైన కాసేపటికే.. పోలింగ్ కేంద్రాల వద్ద బారులుతీరారు ఓటర్లు. యువకుల నుంచి వృద్ధుల వరకు క్యూలో నిలబడి తమ ఓటు హక్కును వినియోగించుకుంటున్నారు. నందిగ్రామ్ నుంచి బరిలో దిగిన నాటి మిత్రులు-నేటి శత్రువులు మమతా బెనర్జీ-సువేందు అధికారి పోరులో ప్రజలు ఎవరిని గెలిపిస్తారనేది సర్వత్రా ఆసక్తిగా మారింది.