పెంపుడు జంతువుల్లో డాగ్ (కుక్క) ఎంత విశ్వాసంగా ఉంటుందో అందరికీ తెలిసిందే. ఒక్కసారి దానికి మనం కొంచెం ఫుడ్పెడితే చాలు.. దాని జీవితాంతం మనకు విశ్వాసం చూపుతూనే ఉంటుంది. ఇంట్లో పెంచుకునే పెట్ నుంచి.. వీధి కుక్కల వరకూ మనం ఎప్పుడు కనిపించినా తోక ఊపుతూ మన చుట్టూ తిరుగుతుంటాయి. అయితే.. కుక్కలకు సంబంధించిన ఓ సరికొత్త అంశాన్ని పరిశోధకులు వెలుగులోకి తెచ్చారు. అదేంటంటే.. ఇప్పటిదాకా అందరూ కుక్కలు మనుషుల వాసనల ఆధారంగా వారిని గుర్తిస్తాయని అనుకున్నారు. కానీ, దీనికి డిఫరెంట్గా ఉంది వారి పరిశోధనల్లో తేలిన అంశం..
కుక్కలు వాసనలను బట్టి యజమానులను గుర్తించవని, తమ యజమాని గొంతు ఎలా ఉన్నా గుర్తుపట్టగలవని తేలిందని కుక్కలపై పరిశోధన జరిగిన ఆండిక్స్ అటిలా తెలిపారు. తమ పరిశోధనల్లో ఇదే తేలిందని చెప్పారు. ఈ పరిశోధనలో భాగంగా 28 కుక్కలను వాటి యజమానులతో కలిసి ఓ ల్యాబ్‌కు తీసుకువచ్చారు హంగేరీలోని బుడాపెస్ట్ లోని ఐయోట్వోస్ లోరాండ్ యూనివర్సిటీ పరిశోధకులు. 28 కుక్కలను, వాటి యజమానులను ల్యాబ్‌లో దాక్కుని ఆడుకోవడానికి ఆహ్వానించారు. కుక్కలు తమ యజమానులను కనుగొనే పనిలో ఉండగా, కొందరు అపరిచితులను కూడా అక్కడ ఉంచారు. ఇప్పుడు ఆ కుక్కలకు యజమాని గొంతు, అపరిచితుని గొంతు వినపించారు.
యజమాని గొంతును 14 మంది అపరిచితుల స్వరాలతో మిక్స్ చేశారు.82% కేసులలో కుక్కలు తమ యజమానిని కనుగొన్నాయని పరిశోధకులు తెలిపారు. కుక్కలు శబ్దం ద్వారా మాత్రమే యజమానిని గుర్తిస్తాయని, వాసన ద్వారా కాదని శాస్త్రవేత్తలు తెలిపారు. చివరి రెండు రౌండ్‌లలో యజమాని స్వరాన్ని వినిపించారు. కుక్కలు ఆ గొంతును గుర్తుపట్టి యజమాని ఎక్కడ ఉన్నాడో గుర్తించాయి. ఐయోట్వోస్ లోరాండ్ యూనివర్శిటీకి చెందిన ఎథాలజీ విభాగంలోని సీనియర్ పరిశోధకుడు తమస్ ఫరాగో మాట్లాడుతూ ఈ ప్రయోగంలో కుక్కలు వాటి వాసనపై ఎక్కువ ఆధారపడకపోవడం ఆశ్చర్యంగా ఉందన్నారు. వాయిస్‌లో తేడాలు ఉన్నా కుక్కలు తమ యజమానిని గుర్తించినట్లు పరిశోధకుల బృందం కనుగొంది.
