తమిళనాడులో నిర్వహించిన బ్యూటీ కాంటెస్ట్లో జరిగిన ర్యాంప్వాక్ వారి ట్రాన్స్ఫర్కు కారణమైంది. హ్యాపీగా ఉన్న పోలీసు ఆఫీసరుతోపాటు మరో నలుగురు కానిస్టేబుళ్లు వేర్వేరు స్టేషన్లకు బదిలీ కావాల్సి వచ్చింది. దీనికంతటికీ మైలాడుతురై జిల్లాలో జరిగిన అందాల పోటీనే కారణంగా తెలుస్తోంది. డ్యూటీలో భాగంగా వెళ్లిన పోలీసు ఆఫీసర్తోపాటు మహిళా కానిస్టేబుళ్లు ర్యాంప్పై వాక్ చేయడంతో మైలాడుతురై జిల్లా ఎస్పీ ఎం. జవహర్‌.. సెంబనార్‌కోవిల్‌ పోలీస్‌ స్టేషన్‌లో పనిచేస్తున్న స్పెషల్‌ ఎస్సై సుబ్రమణ్యంతో పాటు కానిస్టేబుళ్లు అశ్విని, నిత్యశీల, రేణుక, శివనేశన్‌ని జిల్లాలోని వివిధ పోలీసు స్టేషన్లకు బదిలీ చేశారు.
జరిగిన విషయం ఇదే..
తమిళనాడులోని మైలాడుతురై జిల్లాలో జరిగిన అందాల పోటీల కార్యక్రమం వివాదాస్పదంగా మారింది. జులై 31న రాత్రి ఓ మోడలింగ్ కంపెనీ బ్యూటీ కాంటెస్ట్, ర్యాంప్వాక్ వంటి పోటీలు నిర్వహించింది. దీనికి ముఖ్య అతిథిగా తమిళ నటి యాషిక ఆనంద్ హాజరుకావడంతో ర్యాంప్వాక్ని చూసేందుకు ప్రజలు పెద్ద ఎత్తున తరలివచ్చారు. దీంతో భద్రత కారణాల రీత్యా పోలీసులు రావాల్సి వచ్చింది. అయితే.. ఈ కాంటెస్ట్ జరుగుతున్న సమయంలో ఈవెంట్ హోస్ట్ భద్రతను పర్యవేక్షిస్తున్న పోలీసు అధికారిని, కానిస్టేబుళ్లను ర్యాంప్ వాక్ చేయాలని కోరారు.
ఈ క్రమంలో ప్రజల నుంచి వచ్చిన భారీ చప్పట్లతో అధికారులు సంతోషపడ్డారు. అయితే ఏం చేయాలో తెలియని సిచ్యుయేషన్లో అప్పటికప్పుడు పోలీసు యూనిఫాంలోనే ర్యాంప్ వాక్ చేశారు. అయితే.. ఆ తర్వాత వారి ర్యాంప్వాక్ వీడియో సోషల్ మీడియాలో పెద్ద ఎత్తున షేర్ అయ్యింది. డ్యూటీ సమయంలో.. పైగా పోలీసు యూనిఫారంలో ర్యాంప్పై నడవడాన్ని కొంతమంది తప్పుపట్టారు. పోలీసులు ఉద్యోగ గౌరవాన్ని తగ్గించారని కొందరు అంటుండగా..కొంతమంది యువకులు మాత్రం పోలీసు సిబ్బంది తీరును అభినందిస్తూ పాజిటివ్ కామెంట్స్ చేస్తున్నారు.