విద్యార్థులకు శుభవార్త… హైదరాబాద్‌, వరంగల్‌లోని టీజీఎస్ఆర్టీసీ ఐటీఐ కళాశాలల్లో వివిధ ట్రేడ్‌లలో ప్రవేశాలకు ఆసక్తి గల విద్యార్థుల నుంచి సంస్థ దరఖాస్తులను ఆహ్వానిస్తోంది. అర్హత కలిగిన విద్యార్థులు జూన్ 10వ తేదీలోపు ఆన్ లైన్ (iti.telangana.gov.in) లో దరఖాస్తు చేసుకోవాలని సంస్థ సూచించింది. కాగా, లిమిటెడ్‌ సీట్లు ఉండటంతో ఆసక్తి కలిగిన అభ్యర్థులు త్వరగా దరఖాస్తు చేసుకోవాలని టీజీఆర్టీసీ ఎండీ వీసీ సజ్జనార్‌ సూచించారు.
రెండేళ్ల వ్యవధి శిక్షణా కాలంతో మోటార్ మెకానిక్‌ వెహికిల్ (ఎమ్‌మమ్‌వీ), పెయింటర్‌ ట్రేడ్‌లు అందుబాటులో ఉండగా, ఏడాది కాలం పాటు కోర్సుల్లో మెకానిక్‌ డీజిల్, వెల్డర్‌ ప్రవేశాలు కల్పించనున్నారు. ఎమ్‌మమ్‌వీ, డీజిల్ మెకానిక్‌ ట్రేడ్‌లకు పదో తరగతి అర్హత కాగా, మిగతావాటికి ఎనిమిదో తరగతిని విద్యార్హతగా నిర్ణయించారు.
స్వయం ఉపాధి రంగంలో స్థిరపడాలనుకునే వారికి ఐటీఐ కోర్సులు చక్కగా ఉపయోగపడతాయి. నిరుద్యోగ యువతకు చక్కటి శిక్షణ, బంగారు భవిష్యత్‌ అందించడంతో పాటు తక్కువ వ్యవధిలో నిరుద్యోగులకు ఉపాధి కల్పించాలనే ఉద్దేశంతో ఈ ఐటీఐ కళాశాలలను సంస్థ ఏర్పాటు చేసింది. నిపుణులైన అధ్యాపకులతో పాటు అపార అనుభవం గల ఆర్టీసీ అధికారులచే తరగతులను నిర్వహిస్తున్నారు.
ఈ ట్రేడ్‌లలో ప్రవేశం పొందిన విద్యార్థులకు కోరుకున్న టీజీఎస్‌ ఆర్టీసీ డిపోల్లో అప్రెంటిస్షిప్ సౌకర్యం కల్పిస్తున్నట్లు అధికారులు తెలియజేశారు. ఐటీఐ కోర్సుల్లో చేరాలనుకునే విద్యార్థులు హైదరాబాద్‌ ఐటీఐ కళాశాల ఫోన్‌ నంబర్లు 9100664452, 040-23450033, వరంగల్‌ ఐటీఐ కళాశాల ఫోన్‌ నంబర్లలో 9849425319, 8008136611 సంప్రదించాలని సూచించారు. పూర్తి వివరాలను https://iti.telangana.gov.in/ వెబ్‌సైట్‌లోనూ చూసుకోవాలని ఆర్టీసీ సంస్థ వెల్లడించింది.