జార్ఖండ్‌లో అర్థరాత్రి స్పానిష్ మహిళపై సామూహిక అత్యాచారం జరిగింది. దుమ్కాలోని హన్స్‌దిహా పోలీస్ స్టేషన్ పరిధిలో ఈఘ‌ట‌న చోటుచేసుకుంది. ఈ విషయమై బాధిత మహిళ ఫిర్యాదు మేరకు పోలీసులు కేసు నమోదు చేసినట్లు దుమ్కా ఎస్పీ తెలిపారు. ముగ్గురిని అదుపులోకి తీసుకుని వైద్య పరీక్షలతో సహా కేసు దర్యాప్తు చేస్తున్నారు.
స్పెయిన్ యువతిపై సామూహిక అత్యాచారానికి పాల్పడిన ఘటన శుక్రవారం రాత్రి జరిగిందని జర్ముండి సబ్ డివిజనల్ పోలీసు అధికారి సంతోష్ కుమార్ తెలిపారు. ఇది కాకుండా మిగిలిన సమాచారం తర్వాత తెలియజేస్తామన్నారు. శుక్రవారం రాత్రి దంపతులిద్దరూ బైక్‌పై బంగ్లాదేశ్‌ నుంచి దుమ్కాకు చేరుకున్నారు. బీహార్‌ మీదుగా నేపాల్‌ వెళ్తున్నారని మరో అధికారి తెలిపారు. రాత్రి 12 గంటల సమయంలో అతను గుడారం వేసుకుని హన్స్‌దిహా మార్కెట్‌కు ముందు కుంజి-కురుమహత్ అనే ప్రదేశంలో నిలిచాడు.ఈ సమయంలో ఏడెనిమిది మంది స్థానిక యువకులు మహిళపై సామూహిక అత్యాచారానికి పాల్పడ్డారు. ఇప్పటి వరకు ఈ ఘటనకు పాల్పడిన వారిలో ముగ్గురిని అరెస్టు చేశామని, మిగిలిన వారి కోసం గాలింపు కొనసాగుతోందని అధికారి తెలిపారు. బాధితురాలిని స్థానిక ఆసుపత్రిలో చేర్పించారు.