హనుమంతుడు పుట్టింది తిరుమలలోనే: టీటీడీ

కలియుగ ప్రత్యక్ష దైవం వెంకటేశ్వరస్వామి కొలువైన తిరుమల కొండ ఇకపై హనుమంతుడి జన్మస్థలంగానూ గుర్తింపు పొందనుంది. హనుమంతుని జన్మస్థానం తిరుమల క్షేత్రమే అని శాసనాలు, శాస్త్రీయ ఆధారాలతో నిరూపించేందుకు తిరుమల తిరుపతి దేవస్థానం (TTD) సిద్ధమైంది. ఉగాది రోజున ఈ విషయాన్ని ప్రజలకు తెలియజేస్తామని, అన్ని ఆధారాలతో త్వరలో పుస్తకాన్ని తీసుకొస్తామని టీటీడీ ఈవో జవహర్ రెడ్డి తెలిపారు. తిరుమలలోని అంజనాద్రి కొండలో ఆంజనేయుడు జన్మించాడనే విషయాన్ని ఆధారాలతో సహా నిరూపించేందుకు 2020లో టీటీడీ పండితులతో ఓ కమిటీ ఏర్పాటు చేసింది. ఈ కమిటీలో ఎస్వీ వేద విశ్వవిద్యాలయం వీసీ సుదర్శన శర్మ, జాతీయ సంస్కృత విశ్వవిద్యాలయం వీసీ మురళీధర శర్మ, రాణి సదాశివమూర్తి, జానమద్ది రామకృష్ణ, శంకరనారాయణ, ఇస్రో శాస్త్రవేత్త రేమెళ్ల మూర్తి, పురావస్తు శాఖ డిప్యూటీ డైరెక్టర్ విజయ్ కుమార్ సభ్యులుగా ఉన్నారు.