రాగం : ముఖారి
పలుమరు వుట్ల పండుగను
చిలుకు చిడుక్కని చిందగను || || పలుమరు వుట్ల ||
ఊళ్ళ వీధుల వుట్ల కృష్ణుడు
తాళ్ళు తెగిపడ తన్నగను
పెళ్ళు కఠిల్లు పెఠిల్లు చిఠిల్లని
పెళ్ళుగ మ్రోసె పెనురవము || || పలుమరు వుట్ల ||
బంగరు బిందెల పాలు పెరుగులు
ముంగిట నెగయుచు మోదగను
కంగు కళింగు కఠింగు ఖణింగని
రంగు మీరు పెను రవములై || || పలుమరు వుట్ల ||
నిగ్గుగ వేంకట నిలయుడుట్టి పా-
లగ్గలిక పగుల నడువగను
భగ్గు భగిల్లని పరమామృతములు
గుగ్గిలి పదనుగ కురియగను || || పలుమరు వుట్ల ||