కర్నూలు నగరంలో శనివారం చైన్ స్నాచర్స్ హల్ చల్ చేశారు. ఉదయం కర్నూలు నగరంలోని బుధవారపేట, కృష్ణానగర్, బాలాజీ నగర్లలో ఇద్దరు దుండగులు ద్విచక్ర వాహనంపై వచ్చి మహిళల మెడలో ఉన్న బంగారు గొలుసులను దొంగిలించేందుకు తెగబడ్డారు. బుధవారపేటలో ఇంటి ముందున్న ఓ మహిళ మెడలో ఐదు తులాల బంగారు గొలుసులు దుండగులు లాకెళ్ళారు. కృష్ణానగర్ వద్ద ఓ మహిళ మెడలో ఉన్న బంగారు గొలుసు లాగే ప్రయత్నం చేశారు. ఈ క్రమంలో మహిళ కిందపడింది. అప్రమత్తమైన ఆమె గట్టిగా కేకలు వేయడంతో చుట్టుపక్కల ఉన్న స్థానికులు వచ్చి దొంగలను పట్టుకునేందుకు వారి వెంటపడ్డారు. దొంగలు స్థానిక ప్రజలకు దొరక్కుండా బైక్ పై వేగంగా ప్రయాణించి తప్పించుకున్నారు.
ఇదే తరహాలో బాలాజీ నగర్లో కూడా గొలుసు దొంగలు ఓ మహిళ మెడలో బంగారు గొలుసును లాక్కెళ్లే ప్రయత్నం చేయగా.. మహిళ గట్టిగా కేకలు వేయడంతో అక్కడి నుండి పరారయ్యారు. వరుసగా చోటుచేసుకున్న ఈ ఘటనలపై కర్నూలు మూడవ పట్టణ, తాలూకా పోలీస్ స్టేషన్లో కేసులు నమోదయ్యాయి. కర్నూలు నగరంలో ఒకేరోజు మూడు ప్రదేశాల్లో చైన్ స్నాచింగ్ జరగడంతో మహిళలు తీవ్ర భయాందోళన వ్యక్తం చేస్తున్నారు.