బాపట్ల : పాఠశాల బస్సు నడుపుతున్న డ్రైవర్‌కు గుండెపోటు వచ్చింది. ఈ ఘటన ఆంధ్రప్రదేశ్ రాష్ట్రంలోని బాపట్ల జిల్లా అద్దంకి మండలం ఉప్పలపాడు వద్ద చోటుచేసుకుంది. బాపట్ల జిల్లా అద్దంకి పట్టణానికి చెందిన ఓ ప్రైవేటు స్కూల్‌ బస్సు డ్రైవర్ గుర్రాల ఏడుకొండలు(53) మైలవరం, ఉప్పలపాడు, వెంపరాల గ్రామాల నుంచి 40 మంది విద్యార్థులతో పాఠశాలకు వస్తున్నాడు. ఈ క్రమంలో ఉప్పలపాడు దాటిన తర్వాత డ్రైవర్ గుండెపోటుతో కుప్పకూలాడు.
ఆ సమయంలో పాఠశాల బస్సు రోడ్డు మధ్యలో ఆగింది. స్థానికులు గమనించి డ్రైవర్‌ను కిందికి దించి పరిశీలించగా అప్పటికే మృతి చెందాడు. అధికారులు వచ్చి ఘటనాస్థలిని పరిశీలించారు. విద్యార్థులను అదే బస్సులో మరో డ్రైవర్ సహాయంతో అద్దంకికి చేర్చారు.