Saturday, April 20, 2024

మామూలు లీడ‌ర్ కాదండోయ్ – 106ఏళ్ల వ‌య‌సులో-61వ‌సారి యూనియ‌న్ ప్ర‌ధాన కార్య‌ద‌ర్శిగా గెలిచిన క‌న్న‌య్య‌లాల్

యూనియ‌న్ లీడ‌ర్ అంటే ఏముంది..ఒక‌సారో..రెండుసార్లో గెలుస్తుంటారు. కానీ ఈ పెద్దాయ‌న ఏకంగా 61సార్లు యూనియ‌న్ లీడ‌ర్ గా గెలిచి రికార్డ్ సృష్టించారు. ఉత్తరప్రదేశ్ కు చెందిన కన్నయ్య లాల్ గుప్తా అనే పెద్దాయన అత్యంత సుదీర్ఘ కాలం నుంచి కార్మిక సంఘానికి నేతగా కొనసాగుతున్నారు. ఇప్పుడు ఆయన వయసు 106 ఏళ్లు. అలాంటి ఆయన తాజాగా కార్మిక సంఘం ఎన్నికల్లో గెలవడం గమనార్హం. కన్నయ్య లాల్‌ గుప్తా మొదట్లో పదేళ్ల పాటు సైన్యంలో పనిచేశారు. సైన్యం నుంచి రిటైరైన తర్వాత 1946లో ఈశాన్య రైల్వేలో చేరారు. అప్పుడే నార్త్‌ ఈస్టర్న్‌ రైల్వే మజ్దూర్‌ యూనియన్‌ (ఎన్‌ఈఆర్‌ఎమ్‌యూ) సంఘంలో క్రియాశీలకంగా పనిచేయడం మొదలుపెట్టారు. అప్పటి నుంచీ కార్మిక సంఘం నేతగా కొనసాగుతూ వస్తున్నారు. నిజానికి ఆయన 1981లోనే రిటైర్ అయ్యారు.

అయినా ఉద్యోగుల విజ్ఞప్తి మేరకు యూనియన్‌ లో కొనసాగుతున్నారు. ఈ క్రమంలో ఇటీవల జరిగిన యూనియన్ ఎన్నికల్లో 61వ సారి ప్రధాన కార్యదర్శిగా విజయం సాధించారు. యూనియన్ తరఫున పోరాటాల కారణంగా కన్నయ్య తన సర్వీసులో నాలుగు సార్లు డిస్మిస్ అయ్యారట. ఓసారి నెల రోజులు జైలుకు కూడా వెళ్లి వచ్చారని. స్వాతం‍త్ర్య సమరయోధుడు జయప్రకాశ్‌ నారాయణ్‌ స్ఫూర్తితోనే తాను ముందుకు వెళ్తున్నట్టు కన్నయ్య చెబుతున్నారు. ఇన్నేళ్లుగా కలిసి పనిచేయడంతో కార్మిక సంఘం ఆఫీసే ఇల్లుగా, కార్మికులే తన కుటుంబ సభ్యులుగా అయిపోయారట‌. అంతేకాదు రైల్వే యూనియన్ ఆఫీసులోనే ఉంటారు. అక్కడే తిని, అక్కడే నిద్రపోతారు. ఆయన కార్యాలయం కార్మికుల కోసం 24 గంటలు తెరిచే ఉంటుంది.

Advertisement

తాజా వార్తలు

Advertisement