Tuesday, May 28, 2024

విమానంలో బీడి కాల్చిన వృద్ధుడు.. అరెస్ట్ చేసిన పోలీసులు

ఫ‌స్ట్ టైం విమానంలో ప్ర‌యాణిస్తున్న ఓ వృద్ధుడు తెలియ‌క బీడిని కాల్చాడు. దాంతో విమాన సిబ్బంది పోలీసులకు ఫిర్యాదు చేయడంతో ఆ వృద్దుడి కటకటాలపాలయ్యాడు. బెంగళూరు విమానాశ్రయంలో ఈ ఘటన చోటుచేసుకుంది. రాజస్థాన్ కు చెందిన వృద్దుడు ప్రవీణ్ కుమార్ అహ్మదాబాద్ నుండి బెంగళూరుకు విమానంలో ప్రయాణించాడు. నిత్యం రైలు, బస్సుల్లో ప్రయాణించే అతడు మొదటిసారి విమానం ఎక్కాడు.ఈ క్రమంలో విమానం ఆకాశంలో వుండగా బాత్రూంకు వెళ్లిన అతడు బీడి అంటించాడు. దీంతో పొగలు రావడంతో విమానంలోని సెక్యూరిటీ అలారం మోగి ప్రవీణ్ బీడి కాలుస్తున్న విషయం విమాన సిబ్బందికి తెలిసింది. దీంతో వెంటనే విమాన సిబ్బంది బెంగళూరు విమానాశ్రయ అధికారులకు సమాచారం అందించారు.

బెంగళూరు విమానాశ్రయంలో విమానం ల్యాండ్ కాగానే అప్పటికే అక్కడికి చేరుకున్న పోలీసులు వృద్దున్ని అరెస్ట్ చేసారు. విమానాశ్రయం నుండి నేరుగా బెంగళూరు సెంట్రల్ జైలుకు అతడిని తరలించారు. నిబంధనలకు విరుద్దంగా విమానంలో బిడి కాల్చి ప్రయాణికుల ప్రాణాలకు ముప్పు కలిగించేలా వ్యవహరించినందుకు ప్రవీణ్ పై చర్యలు తీసుకున్నట్లు పోలీసులు తెలిపారు. కనీసం అతడికి వారంరోజుల జైలుశిక్ష పడే అవకాశాలున్నాయని పోలీసులు తెలిపారు. అయితే తాను తరచూ రైళ్లలో ప్రయాణిస్తూ వుంటానని… ఆ సమయంలో బాత్రూంలో బీడి కాలుస్తుంటానని వృద్దుడు ప్రవీణ్ తెలిపాడు. అలాగే విమానంలో బీడి తాగవచ్చని అనుకున్నానని… పొగ తాగకూడదని తనకు తెలియదని అన్నాడు. దయచేసి తన తప్పును మన్నించి విడుదల చేయాలని వృద్దుడు పోలీసులను కోరాడు.

Advertisement

తాజా వార్తలు

Advertisement