ఇండోనేషియా మాస్టర్స్ సూపర్ 500 బ్యాడ్మింటన్ టోర్నమెంట్‌లో భాగంగా ఇవ్వాల (గురువారం) జరిగిన పురుషుల సింగిల్స్ ప్రీ-క్వార్టర్ ఫైనల్ మ్యాచ్‌లో కిరణ్ జార్జ్ విజయం సాధించాడు. చైనాకు చెందిన లు-గ్వాంగ్జు తో జరిగిన ఈ మ్యాచ్‌లో 21–11, 13–21, 21–18 పాయింట్ల తేడాతో గెలుపొంది క్వార్టర్ ఫైనల్స్‌కు చేరుకున్నాడు.
కాగా, మరోవైపు.. భారత్‌కు చెందిన లక్ష్యసేన్, ప్రియాంషు రజావత్ లకు తమ ప్రీ-క్వార్టర్ ఫైనల్ మ్యాచ్‌లలో నిరాశే మిగిలింది. తమ ప్రత్యర్థులపై వరుస గేమ్‌లలో ఓడిపోయి టోర్నీ నుంచి వైదొలిగారు. డెన్మార్క్‌కు చెందిన అండర్స్ ఆంటోన్‌సెన్‌తో తలపడిన సేన్ 19-21, 18-21తో ఓటమి పాలయ్యాడు. ఇక, కెనడాకు చెందిన బ్రియాన్ యాంగ్‌తో తలపడిన రాజావత్ 18-21, 14-21 తేడాతో ఓడిపోయాడు.
అయితే, ప్రస్తుతం ఈ టోర్నీలో ఏకైక భారతీయుడిగా కిరణ్ జార్జ్ మాత్రమే కొనసాగుతున్నాడు. కాగా, రెండో రౌండ్ విజయం సాధించి క్వార్టర్ ఫైన‌ల్స్ కు చేరుక‌న్న కిరణ్ తన నెక్స్ట్ మ్యాచ్‌లో థాయ్ కు చెందిన కున్లావుట్ విటిద్సర్న్ తో తలపడనున్నాడు.