ముంబై విమానాశ్రయం రన్వేపై ఓ ప్రైవేట్ జెట్ క్రాష్ ల్యాండ్ అయ్యింది. విశాఖ నుంచి ముంబైకి వెళ్లిన ఈ ప్రైవేట్ విమానంలో ఆరుగురు ప్రయాణికులు, ఇద్దరు సిబ్బంది ఉన్నారు. “VSR వెంచర్స్ లీర్‌జెట్ 45 ఎయిర్‌క్రాఫ్ట్ VT-DBL వైజాగ్ నుండి ముంబైకి వెళ్తోంది.ఈ ఆపరేటింగ్ ఫ్లైట్ ముంబై విమానాశ్రయంలోని రన్వే 27లో ల్యాండ్ అవుతున్నప్పుడు రన్వేపై జారిందని డైరెక్టరేట్ జనరల్ ఆఫ్ సివిల్ ఏవియేషన్ వెల్లడించింది. ముంబయి సిటీలో కురుస్తున్న భారీ వర్షాల కారణంగా ఈ ఘటన చోటుచేసుకుందని, ఈ ప్రమాదంలో ఎలాంటి ప్రాణనష్టం జరగలేదని సమాచారం.
దీనికి సంబంధించి సీసీటీవీ ఫుటేజీని విమానశ్రయ సిబ్బంది రిలీజ్ చేశారు. ల్యాండ్ అవుతున్న క్రమంలో ఈ విమానం నేలను ఢీకొట్టింది. క్రాష్ ల్యాండింగ్ తర్వాత విమానం చుట్టూ తెల్లటి పొగలు కమ్ముకున్నాయి. ఈ ఘటనతో అప్రమత్తమైన అగ్నిమాపక సిబ్బంది హుటాహుటినా అక్కడికి చేరుకుని సహాయక చర్యలు చేపట్టారు. క్రాష్ తర్వాత శిధిలాలు స్పాట్ నుండి క్లియర్ చేశారు. DGCA క్లియరెన్స్ తర్వాత రన్వే మళ్లీ ఓపెన్ చేశారు. ముంబై రన్వే వద్ద ప్రైవేట్ జెట్ క్రాష్ ల్యాండ్ అయిన తర్వాత కొన్ని విమానాలు ఆలస్యంగా నడిచాయి. మరికొన్నిటిని దారి మళ్లించారు.