జాబిల్లిపై అన్వేషణ కోసం ఇస్రో పంపించిన రాకెట్ చంద్రయాన్‌-3 మాడ్యూల్ ను విజయవంతంగా నిర్దేశిత కక్ష్యలోకి ప్రవేశించడంపై రాష్ట్రపతి ద్రౌపదీ ముర్ము , ప్రధాని మోడీ శాస్త్రవేత్తలకు అభినందనలు తెలియజేశారు. చంద్రయాన్‌-3 విజయవంతంగా కక్ష్యలోకి చేరడం భారత అంతరిక్ష పరిశోధనలో మరో మైలురాయిగా అభివ‌ర్ణించారు రాష్ట్రపతి. ఈ విజయం కోసం నిరంతరంగా శ్రమించిన ఇస్రో బృందానికి, శాస్త్రవేత్తలకు అభినందనలు అంటూ సందేశం పంపారు. అంతరిక్ష శాస్త్ర, సాంకేతికతపై దేశం నిబద్ధతను ఈ ప్రయోగం చాటి చెబుతోంది అన్నారు.
భారత అంతరిక్ష చరిత్రలో చంద్రయాన్‌-3 సరికొత్త అధ్యాయాన్ని లిఖించిందని ప్రధాని మోడీ అన్నారు. ఈ విజయం కోట్లాది మంది భారతీయుల కలల్ని, ఆశయాల్ని మరింత ఉన్నత స్థాయికి తీసుకెళ్లిందని ప్ర‌శంసించారు. ఈ మహత్తర విజయం మన శాస్త్రవేత్తల నిర్విరామ అంకితభావానికి నిదర్శనమ‌ని. వారి స్ఫూర్తికి సెల్యూట్ అంటూ ప్రధానమంత్రి నరేంద్రమోడీ ఇస్రో బృందాన్ని అభినందించారు.
చంద్రయాన్‌-3ని విజయవంతంగా కక్ష్యలోకి ప్రవేశపెట్టడంతో భారత్‌ చరిత్రాత్మకమైన అంతరిక్ష ప్రయాణాన్ని ప్రారంభించిందని, తరతరాలు గుర్తుంచుకునే అద్భుతమైన అంతరిక్ష చరిత్రను లిఖిస్తున్న ఇస్రో శాస్త్రవేత్తలకు అభినందనలు అంటూ కేంద్ర హోం మంత్రి అమిత్ షా ట్విట్ చేశారు..
దేశానికి ఇది గర్వించదగ్గ రోజని, దేశ సాంకేతికాభివృద్ధికి ఇది తార్కాణమ‌ని కేంద్ర మంత్రి జితేంద్ర సింగ్ అన్నారు. చరిత్రాత్మక ఘట్టంలో తాను కూడా భాగస్వామి కావడం ఆనందంగా ఉందంటూ ఇస్రో శాస్త్రవేత్తలకు ధన్యవాదాలు తెలిపారు