Friday, February 3, 2023

Delhi | జీవో 1 పై సుప్రీంకు ఏపీ సర్కారు.. హైకోర్టు ఉత్తర్వులను సవాల్ చేస్తూ పిటిషన్

న్యూఢిల్లీ, ఆంధ్రప్రభ: వివాదాస్పద జీవో నెంబర్ 1పై ఆంధ్రప్రదేశ్ రాష్ట్ర ప్రభుత్వం సుప్రీంకోర్టును ఆశ్రయించింది. ఈ జీవోపై స్టే విధిస్తూ ఏపీ హైకోర్టు ఇచ్చిన తీర్పును సవాల్ చేస్తూ మంగళవారం సుప్రీంకోర్టులో పిటిషన్ దాఖలు చేసింది. రాష్ట్ర ప్రభుత్వంతో పాటు డీజీపీ కూడా ఈ కేసులో పిటిషనర్లుగా ఉన్నారు. రోడ్లు, రహదారులపై సభలు, సమావేశాలను నిషేధిస్తూ ఆంధ్రప్రదేశ్ రాష్ట్ర ప్రభుత్వం జారీ చేసిన జీవో నెంబర్ 1ను ప్రతిపక్షాలు తీవ్రంగా తప్పుబట్టిన విషయం తెలిసిందే. ఈ క్రమంలో సీపీఐ రాష్ట్ర కార్యదర్శి కే. రామకృష్ణ ఏపీ హైకోర్టులో జీవోను సవాల్ చేస్తూ పిటిషన్ దాఖలు చేశారు. భావప్రకటనా స్వేచ్ఛను హరించేలా ఈ జీవో ఉందని ఆరోపించారు. రామకృష్ణ పిటిషన్‌పై విచారణ జరిపిన హైకోర్టు, జీవోను జనవరి 23 వరకు సస్పెండ్ చేస్తూ మధ్యంతర ఉత్తర్వులిచ్చింది. తదుపరి విచారణ జనవరి 20కి వాయిదా వేసింది.

- Advertisement -
   

అయితే జీవో అమలు విషయంలో రాష్ట్ర ప్రభుత్వం వెనక్కి తగ్గడం లేదు. పోలీస్ యాక్ట్ 1861 ప్రకారం ఈ జీవో జారీచేసినట్టు రాష్ట్ర ప్రభుత్వం చెబుతోంది. కందుకూరులో జరిగిన తొక్కిసలాటలో కొందరు ప్రాణాలు కోల్పోయిన నేపథ్యంలో జాతీయ రహదారులు, రాష్ట్ర రహదారులతోపాటు పంచాయితీ రాజ్ రోడ్లు, మున్సిపల్ రోడ్లపై సభలు, సమావేశాలను నిషేధిస్తూ ఈ జీవోను విడుదల చేసినట్టు రాష్ట్ర ప్రభుత్వం చెబుతోంది. ప్రజలకు ఇబ్బందులు కల్గించకూడదన్న ఉద్దేశంతోనే ఈ జీవో జారీ చేశామని, ప్రజలకు అసౌకర్యం కల్గని ప్రాంతాల్లో సభలు నిర్వహించుకోవాలని స్పష్టం చేసింది. నిషేధాజ్ఞలను ఉల్లంఘిస్తే కఠిన చర్యలు తీసుకుంటామని జీవోలో పేర్కొంది. భావప్రకటనా స్వేచ్ఛకు విఘాతం కల్గించే అంశమేదీ ఇందులో లేదని వాదిస్తోంది. ఏపీ హైకోర్టులో ఈ కేసు తదుపరి విచారణ జరగకముందే రాష్ట్ర ప్రభుత్వం మంగళవారం సుప్రీంకోర్టును ఆశ్రయించి వెంటనే విచారణ చేపట్టాల్సిందిగా విజ్ఞప్తి చేసింది. జీవో అమలుపై ఏపీ హైకోర్టు విధించిన సస్పెన్షన్‌ను ఎత్తివేయాలని పిటిషన్లో కోరింది.

Advertisement

తాజా వార్తలు

Advertisement