10. నిప్పై పాతకతూలశైల మడచున్ నీ నామము న్మానవుల్
దాపున్ దవ్వుల విన్న నంతక భుజా దర్పోద్ధత క్లేశముల్
తప్పుం దీరును ముక్తులౌదురని శాస్త్రంబు ల్మహాపండితుల్
చెప్పంగా దమకింక శంక వలెనా శ్రీకాళహస్తీశ్వరా!
ప్రతిపదార్థం: శ్రీకాళహస్తీశ్వరా! నిప్పు – ఐ – అగ్ని వలె, పాతక – పాతకములు అనే, తూల – దూది, శైలము – కొండను, అడచున్ -నశింప చేయును, నీనామమున్ – నీ పేరును, మానవుల్ – మనుషులు, తప్పన్ – పొరపాటుగా నైనా, దవ్వుల -దూరంగా నైనా, విన్నన్ -విన్నచో, అంతక -యమును యొక్క, భుజాదర్ప-భుజ గర్వము వలన కలిగిన, క్లేశముల్ – మహా దుఃఖములు, తప్పున్ -తొలగును, తరును -తాము కూడా ( అనగా విన్న వారు), ముక్తులు – మోక్ష స్థితిని పొందిన వారు, ఔదురు – అని – అవుతారని, శాస్త్రంబుల్ – అన్ని శాస్త్రాలు, మహాపండితుల్ – గొప్ప విద్వాంసులు, చెప్పన్ – కాన్ – చెప్పుచు ఉండగా, తమకున్ -ఈ మనుష్యులకు, ఇంక – ఇంకను, శంకలు – అనుమానాలు, వలెనా? ఉండ వలసిన అవసరం ఉన్నదా? (సందేహింప పని లేదని భావము)
తాత్పర్యం: శ్రీకాళహస్తీశ్వరా! నీ నామము పాపములు అనే ప్రత్తి కొండాలని నాశము చేస్తుంది. మానవులు నీ నామాన్ని దూరం నుండి విన్నా సరే యముడి భుజగర్వం వలన కలిగిన గొప్ప కష్టాలు ( నరక బాధలు) తప్పి పోవటమే కాదు, విన్న వారు మోక్షాన్ని పొందుతారు అని శాస్త్రాలు, అవి చదివిన పండితులు కూడా చెపుతున్నారు. మనుషులకు ఇంకా సందేహం ఎందుకు? ( అనగా నామస్మరణ చేయటం ఇంకా ఎందుకు మొదలు పెట్టరు? అని భావము.
విశేషం: ఇందు నామ స్మరణ గొప్పరాణాన్ని గురించి చెప్పబడింది.
పాతకములు అంటే నిష్కృతి లేని గొప్ప పాపాలు, దుష్కర్మలు.
కావాలని కాక పోయినా , పొరపాటుగా నైనా తాను అనక పోయినా, ఎవరైనా అంటుంటే విన్న సరే. నరక బాధలు తొలగి ముక్తి లభిస్తుందిట. మరి, ఇష్టంతో త్రికరణశుద్ధితో నామజపం చేస్తూ, వింటూ ఉంటే ఫలితం ఎంత ఉంటుందో దీనిని బట్టి ఊహించ వచ్చును.
